Qabsoomida Doorashadda Dadban ee sannadkan waxaa muruq-siyaasadeed dheeri ah ku yeeshay Madaxda Maamul-gobaleedyadda oo iyaguna qeyb ka noqday Isbaaradda dadban ee lagu carqaladaynayo Nidaamka Doorashadda.
Iyadoo la og yahay inay Dowladda Federalka noqotay mid Fadhiid oo waxtar badan lahayn, haddana waa hubaal in caqabadaha Maamul-gobaleedyadda isbaaro-siyaasadeed horey ugu dhigteen Dowladda Federalka ee uu xilligeeda dhamaada.
Waxaana markhaati laga yahay inay jiraan Maamul-gobaleedyo caadi ka dhigtay inay Tallaabo kasta oo la qaado jalaafeeyaan, waxayna haatan xaalladu maraysaa hal-qabsigii ahaa Ka-dorro dibi dhal oo kale.
Awooda aan Dastuuriga ahayn ee ay qaar ka mid ah Madaxda Maamul-gobaleedyadda la soo baxeen ee ay horey kaga guuleysteen Dowladda Federalka ayaa waxay haatan mar kale bilaabeen inay cudud-muujin u adeegsadaan Nidaamka Doorashadda, waxayna carqaladeyn la kowsadeen Saami-qeybsigii Beelaha ka heleen Labada Aqal ee Barlamaanka Federalka ee soo socda iyo Nidaamka Cod-bixinta Doorashadda.
Waa Halbeeg Siyaasadeed ay Maamul-gobaleedyadda doonayaan inay miisaan culus ku yeeshaan Tallaabo kasta oo la qaadayo, waxaana laga wada dheregsan yahay halka ay Maamul-gobaleedyadda dhigeen Awooddii Madasha Wada-tashiga Qaranka, Guddiga Federalka ee Doorashadda Dadban iyo Baaqyadda Beesha Caalamka ka soo saaraan Arrimaha Somalia iyo Nidaamka Cod-bixinta Doorashadda Dadban.
Xaalladda ayaa haatan meel cakiran taagan, waxaana soo badanaya Cabashadda laga keenayo Awood-sheegashadda Maamul-gobaleedyadda, iyadoo Madaxweynihii Heerka Gobalka door-bidayo inuu ka amar sarreeya Madaxda Qaranka iyo Hay’addaha loo xil-saaray Doorashadda.
Tusaale ahaan, Maamulka HirShabelle waxay gaashaanka ku dhufteen War-saxaafadeed uu Gudoomiyaha Guddiga Federalka ee Doorashadda, Avvocate Omar Mohamed Abddulle uu bishan December 8-dii ka soo saaray Laba Musharax oo colaad hubeysan ka dhex sameeyey Hoolkii Doorashadda ee magaalladda Jowhar.
War-saxaafadeedka waxaa lagu xusay in Wasiirka Dhallinyarada iyo Sport-ga ee XFS, Maxamed C/lLahi Nuux iyo Musharax Axmed Sheekh Nuur “Cirro†laga mamnuucay inay dib u tartamaan, kadib, markii lagu helay inay ku lug lahaayeen shaqaadadii bishii November 18-dii ka dhacday Jowhar, kuna dhaawacmeen 6 qof oo rayid ah.
War-saxaafadeedka ayaa lagu xusay in Musharax Maxamed C/llaahi Xasan (Nuux), ahna Wasiirka Dhallinyarada iyo Sport-ga ee Xukuumadda Federalka ku lug lahaa fowdo ka dhacday Hoolka Doorashadda ee Jowhar, iyadoo Musharaxa kale ee la tartamayey, Axmed Sheekh Nuur (Cirro) lagu eedeeyey inay Taageerayaashiisa bilaabeen rasaasta ka dhacday bannaanka Xarunta Doorashadda ee Jowhar.
Labadaasi Musharax ayaa la go’aamiyey inaysan isku soo sharxi Karin Kursiga Beesha Jiidle, waxayna Guddiga Doorashadda ka codsadeen Ugaaska Beeshaasi inuu soo xulo Ergo cusub oo doorata Musharaxiinta ku tartamayso Halka Kursi ee ay Beeshaasi ku leedahay Aqalka Hoose ee Barlamaanka Federalka ee soo socda.
Go’aanka Guddiga Federalka ee Doorashadda Dadban ka soo baxay Arbacadii la soo dhaafay (December 8)-dii ayaa waxa uu maanta noqday Go’aan ma-dhalays ah, kadib, markii ay Madaxda Maamul-gobaleedka HirShabelle iyo Guddiga Doorashadda ee Heerka Gobal qabteen Doorasho uu Wasiir Nuux ku soo baxay.
Dhacdadan La-yaabka Doorashadda qeyb ka ah ayaa muujinaysa inay Maamul-gobaleedyadda dhegaha ka fureystaan Baaqyadda Guddiga Madaxa Bannaan ee Doorashadda Dadban ee Federalka oo haatan u taagan Hay’adda Guud ee Doorashadda Qaranka.
Inkastoo Doorashadda uu Wasiir Nuux ku soo baxay tahay mid rimay-gacmeed oo kale ayaa waxa la isweydiin karaa Maxaa laga dhaxli doonaa Doorashadda maanta sida degdegga loogu kala baxay.
Madaxda Maamulka HirShabelle oo iyagu ah Madax ku cusub Masraxa Siyaasadda waxaa suurtogal ah in la hoos geliyey Doorashadda, iyagoo laga faa’ideystay Waayo-aragnimo La’aantooda Maamulka iyo Kala-dambaynta Haykalka Dowladeed.
Waana Xaallad Dhaban-hays ku abuuri karta Nidaamka doorashadda ee horey loo sheegay inuu harreeyey musuq, faragelin, Maamul-xumo iyo Tacadiyo loo geystay Musharixiinta, Ergooyinka, lana boobay Kurraas loo qoondeyeey Haweenka.
Guddiyada Madaxa-Bannaan ee Doorashadda iyo Xalinta Khilaafyadda ee Doorashadda ayaa laga filayaa inay gho’aan cad ka qaataan Kursi kasta oo si qallafsan loo maamulayo, iyadoo Go’aanada Guddiyadaasina yihiin kuwa ugu dambeeya ee lagu qanci karo.
Guddiyadaasi iyo Ergooyinka Beesha Caalamka ayaa had iyo jeer ka diga Musuqa lagu furdaamiyo Cod-bixinta Doorashadda, iyadoo Doorashaddan lagu tilmaamo midda ugu musuqa badan Doorashooyinkii soo maray dalkeena.
Si kastaba ha ahaatee, Khilaaf kasta iyo xadgudub kasta oo lagu marin habaabiyo Cod-bixinta Doorashadda waxay sii seeta dheereyn kartaa Jadwalka Doorashadda Madaxtinimadda iyo tan Guddoomiyaha Barlamaanka ee ay Madaxda Madasha Wada-tashiga Qaranka dhawaan iclaamiyeen.
©Radio Dalsan
