Warar dheeraad ah ayaa kasoo baxaya Qarax miino nooca dhulka lagu aaso oo duhurnimadii Maanta ka dhacay duleedka Magaalada Muqdisho, kaasi oo geystay Khasaaro kala duwan.
Qaraxaas ayaa waxaa lala eegtay Gaari nooca raaxada ah oo ay la socdeen dad aan la Cadeyn waxa ay ahaayeen, waxaana uu gaariga qaraxu haleeyay xili uu mararay inta u dhexeeysa Xaawo-Cabdi iyo deegaanka Lafoole.
Dad goobjoogayaal ah ayaa waxaa ay sheegeen in qaraxa uu geystay Khasaaro isugu jira dhimasho iyo dhaawac, waxaana ku geeriyooday Afar ruux oo la tilmaamay inay la socdeen gaariga uu qaraxu qabsaday, halka ay ku dhaawacmeen dad kale oo halkaas ka Agdhawaa.
Ciidamo ka tirsan kuwa Booliska dowladda oo xiligaas ku sugnaa meel aan sidaas ugu fogeyn halka uu qaraxa ka dhac ayaa tegay goobta, iyagoona sameeyay baaritaano ku aadan sida ay wax u dhaceen.
Ilaa iyo hada ma jirto cid sheegatay Mas’uuliyada qaraxaas ka dhacay duleedka Magaalada Muqdisho, hayeeshee Qaraxyada noocaan oo kale ayaa waxaa mararka qaarkood lala eegtaa Ciidanka dowladda xiliyada halkaas ay socdaalka ku marayaan.