Faah faahino ayaa kasoo baxaya Kooxo ku hubeysnaa Bastoolado ayaa xalay Xaafad ka tirsan Degmada Hodan ee Gobolka Banaadir ku dilay Wiil dhalinyaro ah oo gadayay Xarun Farmashiye.
Dad goobjoogayaal ah oo la hadlay Idaacadda Dalsan ayaa waxaa ay u sheegeen in dilkaas loo geystay Wiilka uu ka dhex-dhacay Farmashiga uu ku ganacsanayay oo ku yaalla Xaafada Afrikada ee Hodan, isagoo u geeriyooday rasaas dhowr ah oo lagu dhuftay.
Marxuumka la dilay ayaa waxaa lagu magacaabi jiray Faysal Maxamed Xuseen, iyadoona ragga hubeysan ee dilkiisa fuliyay ay isaga dhigeen dad doonayay ay kaniini ka iibsadaan, hayeeshee ay toogteen.
Wararka ayaa intaas kusii daraya in Farmashiga lagu dilay Marxuum Faysal Maxamed uu lahaa Aabihiis Dr Maxamad Xuseen, waxaana halkaas si deg deg ah uga baxsaday ragii ka dambeeyay falkaas.
Ciidamo ka tirsan kuwa Booliska Dowladda oo xiligaas ku sugnaa meel aan sidaas uga fogeyn goobta iyo qaar kamid ah Ehelada Faysal ayaa tegay Farmashiga, iyagoo goobta ka qaaday Meydkiisa.
Lama oga sababta loo dilay Wiilkaas dhalinyarada ahaa, hayeeshee dilkiisa ayaa waxaa uu qeyb ka noqonayaa dilal dhowr ah oo horey uga dhacay Magaalada Muqdisho, kuwaasi oo fuliyeen rag dhalinyaro ah kuna hubeysnaa Bastoolado.
