Faah faahino ayaa laga helayaa Darawal Mooto Bajaajle ahaa oo daqiiqado kahor lagu dilay Isgoyska Korontada ee degmada Wadajir ee Gobolkaan Banaadir, wuxuuna Darawal u geeriyooday rasaas looga dhuftay qeybaha sare ee jirkiisa.
Goobjoogayaal la hadlay Idaacadda Dalsan ayaa u sheegay in Darawalka la dilay uu Mooto Bajaajta ku siday qaad uu soo qaaday, isla markaana waxaa falkaas u geystay oo wadada u galay rag hubeysan oo Macwiis watay, iyagoona rasaas ku furay Darawalka.
Darawalka dhintay ayaa la tilmaamay inuu Mootada u waday, si xawaare dheereeya ah, waxaana ragga hubeysan markii dambe ay qaateen qaadkii ay sidday Mootada, kaasi oo loo waday goob lagu iibiyo Jaadka la keeno Magaalada Muqdisho.
Meydka Darawalka oo dhallinyaro ahaa ayaa waxaa daqiiqado kadib goobta uu falku ka dhacay laga qaaday, halkaas oo aheyd Isgoyska Korontada ee degmada Wadajir ee Gobolkaan Banaadir, sida ay sheegeen dad goobta ku sugnaa.
Magaalada Muqdisho ayaa waxaa horey loogu dilay Darawalo Mooto Bajaaj ku shaqeysan jiray oo dhallinyaro ahaa, waxaana inta badan darawaladii lagu dilay Caasimadda dilalka u geystay Askar ka tirsan Ciidanka dowladda Federaalka Soomaaliya.