Eedeysanihii Maraykanka ee ololiyey goobtii ganacsiga ee ay dadka Soomaalida lahaayeen oo la qabtay.

Eedeysane Mathew Gust ayaa la shaaciyey in gacanta lagu dhigay, kadib, markii ay Boliska baadi-goobayeen tan iyo bishan December 8-dii.

Eedeysanaha oo 25 jir ayaa waxaa Waaberigii hore ee saakayto loo gudbiyey Qeybta Dembi-baarista Boliska ee Deegaanka Polk ee Gobalka Minnesota.

Saraakiisha Xabsiga Polk wey xaqiijiyeen in ay gacanta ku hayaan Eedeysanaha, oo ah Dembiile galay  Fal-dembiyeedka Heerka Koowaad iyo inuu u adeegsaday Gaas si uu u ololiyo goobta ganacsiga ee Soomaalida.

Wargeyska The Valley News Live ayaa goor dhow shaaciyey in la qabtay Eedeysanaha, laguna soo oogi doono Fal-dembiyeed Nacayb uu u muujiyey Dad Somali, isla markaana uu dab qabadsiiyey goob ganacsi oo ku taalla Degmadda Grand Forks.

Jimcihii la soo dhaafay ayey Maxkamaddu amar ku bixisay in la soo qabto Eedeysanaha oo Muuqaalkiisa laga aqoonsaday Kamerooyinka Qarsoon ee CCTV ee ku rakiban goobta Ganacsiga ee uu gubay oo lagu magacaabo The Jubba Coffe House and Restaurant.

Milkiilayaasha leh goobtaasi ganacsiga waxay sheegeen inuu dabku khasaaro ba’an u geystay Ganacsigooda, waxayna Khasaaraha ku qiimeeyeen lacag dhan 90,000 oo Dollar.

© Radio Dalsan