Warar lagu kalsoonaan karo oo aan helnay ayaa sheegaya inuu mar labaad dib u dhac uu ku yimid Shirkii aan caadi aheyn oo Maanta ay yeelan lahaayeen Golaha Wasiirada Xukuumadda Federaalka Soomaaliya.
Shirkaan ayaa la doonayay in looga arrimo kala duwan oo ay kamid yihiin xaaladda siyaasadeed ee dalka iyo Arrimaha doorashooyinka Soomaaliya ee dhacaya dhammaadka sanadkaan 2020/21, kuwaasi oo horey heshiis rasmi ah looga gaaray.
Xoghayaha Xafiiska Ra’iisul Wasaare Maxamed Xuseen Rooble ayaa Golaha Wasiirada Xukuumadda ku wargeliyay inuu baaqday kulankii Maanta oo sabti ah ay yeelan lahaayeen xubnaha Golaha Wasiirada.
Sidoo kale Shirka baaqday ayaa intiisa badan looga hadli lahaa xaaladda Maamulka Jubbaland iyo khilaafka kala dhexeeya dowladda Federaalka, waxaana wararka qaarkood ay sheegayeen in Xukuumadda ay Go’aan kasoo saari rabto Jubbaland.
Golaha Wasiirada Xukuumadda Ra’iisul Wasaare Rooble ayaa la filayay in kulankii Maanta baaqday ay yeeshaan khamiistii lasoo dhaafay, hayeeshee mar kale ayaa Golaha Wasiirada lagu wargeliyay in kulankii Maanta oo sabti ah loo balansanaa uu baaqday.
Madaxweynaha Jubbaland Axmed Madoobe ayaa dhawaan sheegay in deegaanada maamulkiisa aysan ka dhici doonin Doorashada Xildhibaanada Baarlamaanka Federaalka ilaa iyo inta Maamulkiisa gacanta loogu soo celinayo Gobolka Gedo, isla markaana laga saaro Ciidanka ay halkaas kal horey geeysay dowladda Federaalka.