Safiirka Soomaaliya u fadhiya Dalka Kenya Danjire Maxamuud Axmed Nuur Tarsan ayaa shaaciyey in uusan dhicin kulan dhexmaray Madaxweyne Farmaajo iyo Safiirka Mareykanka ee Kenya xiligii uu booqashada ku yimid oo aheyd dhowr bilood ka hor.
Safiirka Mareykanka u jooga Kenya Kyle McCarter oo wareysi siiyay wargeyska Daily Nation ayaa waxaa uu sheegay in xili uu booqasho ku yimid Muqdisho uu kulan la qaatay Madaxweyne Maxamed Cabdullaahi Farmaajo,isla markaana uu kala hadlay arrimaha dacwada Badda ee Somalia iyo Kenya,isagoona la dalbaday in Kiiska uu ka soo saaro Maxkamada, oo arrinta wadahadal lagu xaliyo.
Wuxuu intaa ku daray Safiirka Mareykanka u jooga Kenya in Farmaajo iyo Uhuru ay u sheegeen in caqabada ugu weyn ay tahay in laga adkaado Al-Shabaab waa sida uu hadalka u dhigay.
Hayeeshee hadalkaas kasoo yeeray Safiirka Mareykanka ee Kenya ee ahaa inuu la kulmay Madaxweyne Farmaajo waxaa beeniyay Safiirka Soomaaliya u fadhiya Dalka Kenya.
Qoraal uu bartiisa Facebook soo dhigay Amb. Tarsan ayuu sheegay inuusan dhicin kulan dhexmaray Madaxweyne Farmaajo iyo Safiirka Mareykanka u jooga Kenya.
“Ummadda Soomaaliyeed waxaan wargalinaynaa inuusan dhicin kulan dhexmaray Madaxweyne Farmaajo iyo Safiirka Mareykanka ee Kenya xilligii uu booqashada ku yimid Muqdisho oo ahayd dhawr bilood kahor”ayuu yiri Danjire Maxamuud Axmed Nuur Tarsan.
Si kastaba Kyle McCarter ayaa waxaa uu tilmaamay in Madaxweynaha Soomaaliya uu ka dalbaday in dacwadda badda lagu xaliyo meel kabaxsan Maxkmadda caalamiga ah ee ICJ.