Wararka aan ka heleyno degmada Ceel-waaq ee Gobolka Gedo ee koonfurta Soomaaliya ayaa waxaa ay sheegayaan in Garoonka diyaaradaha ee ku yaalla degmadaas ay xireen Ciidanka dowladda Kenya ee AMISOM ee jooga halkaas.
Ciidanka Kenya ayaa dhagxaan farabadan ku xiray dhabbaha Garoonka Ceel-waaq ee cagga dhigtaan diyaaradaha halkaas ku dega, waxaana istaagay shaqooyinka Garoonka, sida ay sheegayaan dadka deegaanka.
Dadka deegaanka Ceel-waaq ayaa Ciidanka Kenya ka dalbaday inay dib u furaan Garoonka ay dhagxaanta ku xireen, si dadka Gobolka Gedo ee abaarta heyso loo soo gaarsiiyo Gargaar deg deg ah.
Qaar kamid ah dadka ayaa dowladda Federaalka ugu baaqay inay Gargaar lasoo gaaran, isla markaana la furo garoonka diyaaradaha degmada ay xireen Ciidanka dowladda Kenya ee qeyta ka ah howlgalka AMISOM, lamana oga sababta ay u xireen.
Maamulka Gobolka iyo kan degmada Ceel-waaq ayaa weli ka hadlin sababta ay Ciidanka Kenya ku xireen Garoonka, xili dadka kunool Gobolkaas ay saameysay abaar xoogan, isla markaana halkaas ka jirto biyo la’aan.
Gobolka Gedo ee koonfurta Soomaaliya ayaa waxaa xiligaan ka jira abaaro darran oo sameeyay dadka iyo xoolaha, isla markaana waxaa go’ay ceelashii biyaha laga cabi jiray, iyadoona dadka ay heysato xaalad adeg oo u baahan in gurmad deg deg ah la gaarsiiyo.
