Ciidanka Dowladda oo Maanta Al-shabaab kala wareegay degaanka Cadcadeey

Ciidanka dowladda Federaalka Soomaaliya gaar ahaan Milateriga iyo Ciidanka deegaanka ee loo yaqaan macwiisleyda ayaa Maanta la wareegay gacan ku heynta deegaanka Cadcadeey oo ka tirsan Gobolka Shabeellaha Dhexe ee Maamulka Hirshabeelle.

Ciidamada dowladda iyo kuwa macwiisleyda ayaa dagaal la’aan qabsaday deegaanka Cadcadeey oo ay muddo sannado ah ku sugnaayeen dagaalamayaasha Al-shabaab oo la sheegay inay isaga baxeen deegaankaas, sidaasina ugu suuragashay Ciidamada inay la wareegaan.

Saraakiisha hoggaamineysa Ciidanka oo uu kamid ah Taliyaha qeybta 27-aad ee Ciidanka Xoogga Jeneraal Axmed Maxamed Calasow Treedishe ayaa sheegay in Ciidanka ay si nabad ah saaka oo khamiis ah ku gaareen deegaanka Cadcadeey ee Shabeellaha Dhexe.

Wuxuu intaas kusii daray Taliye Tareedisho inay sii socon doonaan howlgalada ka dhanka ah Al-shabaab ee ka socda Gobolka, isla markaana ay kusii wajahan yihiin deegaano kale oo ay Shabaabka ku sugan yihiin oo ay kamid tahay Runnirgood.

Ciidanka dowladda Federaalka Soomaaliya gaar ahaan Milateriga iyo Ciidanka deegaanka ee loo yaqaan macwiisleyda ayaa horey Shabaab ula wareegay deegaano ka tirsan Gobolka Shabeellaha Dhexe oo ay sanno badan ku sugnaayeen Al-shabaab.

About Webmaster

View all posts by Webmaster
%d bloggers like this: