Ciidamo ka tirsan kuwa dowladda Federaalka Soomaaliya ee ku sugan Degmada Doolow ee Gobolka Gedo ayaa xalay howlgal qorsheysan waxaa ay ka sameeyeen Guriga Wasiirka amniga Jubbaland Cabdirashiid Xasan Cabdinuur Janan eek u yaalla halkaas.
Ciidamada ayaa waxaa la sheegay inay gudaha u galeen Guriga Wasiir Janan oo baxsad ka ah dowladda Soomaaliya, waxaana Ciidanka la tilmaamaay inay Guriga kasoo qabteen hub kala duwan iyo agabyo kale oo yaallay.
Dad ku sugan Degmada Doolow oo warbaahinta la hadlay ayaa waxaa ay sheegeen in xalay mararka qaarkood gudaha Magaalada laga maqlayay rasaas ay ridayeen Ciidamo ka tirsan kuwa dowladda Federaalka.
Sidoo kale Ciidamada dowladda ayaa howlgal kale ka sameeyay Xaafaddo badan oo ka tirsan Degmada Doolow ee Gobolka Gedo, waxaana la xusay in howlgalkaas la sameeyay uu ahaa mid amniga lagu xaqiijinayay.
Wasiirka amniga Jubbaland Cabdirashiid Xasan Cabdinuur Janan oo baxsad ka ah dowladda Soomaaliya ayaa waxaa uu ku sugan yahay Magaalada Mandheera ee Gobolka Waqooyi bari ee dalka Kenya, waxaana halkaas kula sugan Ciidamo badan oo isaga ilaalo u ah.
Dowladda Federaalka Soomaaliya ayaa bil kahor Ciidamo badan geysay degmooyin ka tirsan Gobolka Gedo, kuwaasi oo dagaal uu dhexmaray iyaga iyo kuwa maamulka Jubbaland ee halkaas ku sugan, waxaana Ciidanka dowladda geysay Gedo siweyn uga soo horjeestay siyaasiyiin kala duwan iyo Beesha Caalamka.