CCA oo Tartan lagu maamusayo Nabadda iyo Isdhexgalka Goballada Hiiraan iyo Sh/dhexe oo ku qabatay Jowhar.

Hay’adda Wacyi-gelinta Bulshadda Soomaaliyeed Center for Community Awareness (CCA) oo ka mid ah Hay’addaha Waddaniga ee safka hore kaga jira Wacyigelinta Nabadda iyo Horumarinta Sport-ga waxay Tartan Sport oo K/cagta ah u qabanqaabisay Kooxo ka dhisan Goballadda Hiiraan iyo Sh/dhexe.

Tartankaasi oo loogu magac-daray “Tartanka Nabadda iyo Isdhexgalka Goballadda Hiiraan iyo Sh/dhexe”  ayaa la soo gebagebeeyey bishan Feberaayo 2-dii, iyadoo uu Tartankaasi bilowdayoo dabayaaqadii bishii hore ee Janaayo ee sannadkan 2016-ka .

Tartankaasi waxa lagu qabtay Garoonka K/cagta ee SNAI Stadium ee ku yaalla magaallo-madaxda Gobalka Sh/dhexe ee Jowhar.

Hal-ku-dhegga CCA ayaa ah: “Sport-ga waxaan ku dhisi karnaa Nabad iyo Dulqaad”.

Hay’adda CCA waxay u isticmaashaa Ciyaarta K/cagta sidii Bulshadda si wadajir ah la isugu keeeni lahaa Nabadda iyo Wacyi-gelinta Muhiimadda Midnimadda Ummadda Soomaaliyeed.

Tartanka K/cagta ee lagu qabtay Garoonka SNAI ee magaalladda Jowhar waxaa ka qeyb galay Naadiyadda K/cagta ee horey u soo qaaday Horyaalka Tuullooyinka Labad Gobal ee Hiiraan iyo Sh/dhexe.

Taageerayaal badan oo jecel Ciyaaraha K/cagta ayaana u soo daawasho tegi jirey Tartankaasi oo ay ka qeyb galeen Ciyaartoy da’doodu u dhexeyso 15 jir ilaa 35 jir.

Munaasabadda furitaanka Tartankaasi waxaa Khudbado ka jeediyey Saraakiil Sare oo ka socotay Labada Gobal, kuwaasi oo isugu jiray kuwo Heer Gobal, kuwo Heer Degmo, xubno ka tirsan Guddiyadda Sports iyo Wafdiga CCA ee qabanqaabiyey Tartankaasi.

Guddoomiyaha Degmadda Jowhar, Yuusuf Xaamud Jurus ayaa si rasmi ahaan u furay Tartankaasi oo bilowday dabayaaqadii bishii hore ee Janaayo, lana soo gebagebeeyey bishan Feberaayo 2-da ee sannadkan 2016-ka.

Md. Yuusuf Xaamud Jurus waxa uu u mahadceliyey Hay’adda CCA, wuxuuna soo dhaweeyey Is-dhexgalka Dhallinyaradda iyo Sport-ga.

Waxa uu carrabka ku dhuftay inuu Tartanka K/cagta ee Labada Gobal yahay markii ugu horreysay oo la qabto Tartan lagu dhiiri-gelinayo Midnimadda Dhallinyaradda ku nool Goballadda Sh/dhexe iyo Hiiraan, wuxuuna ugu baaqay Dhallinyaradda inay kordhiyaan Isdhexgalka iyo midnimadda, kana qeyb ga;aan Dadaalka Dib-u-heshiisiinta ee Labada Gobal.

Munaasabadda Furitaanka Tartankaasi waxaa kaloo ka hadlay Xoghayaha Sport-ga ee Degmadda Jowhar, Cali Hilowle Cabdi iyo Ku-xigeenka Guddoomiyaha Degmadda Jowhar ee Arrimaha Bulshadda, Maxamuud Sugaal.

Xoghayaha Sport-ga ee Degmadda Jowhar, Cali Hilowle Cabdi waxa uu ka mahadceliyey Tartanka ay Hay’adda CCA u qabanqaabisay Ciyaartoyda K/cagta ee labada Gobal, wuxuuna xusay inay soo dhaweeynayaan Tartamadda noocaasi ah.

“Waan ku faraxsanahay inay Hay’adda CCA ka soo jawaabto Codsigeenna, isla markaana ay Tartan K/cagta u qabtaan Kooxo ka kala socda Goballadda Hiiraan iyo Sh/dhexe, si loo xoojiyo Isdhexgalka iyo Midnimadda Bulshadda” ayuu yiri Xoghayaha Sport-ga ee Degmadda Jowhar, Cali Hilowle Cabdi.

Waxa uu ugu baaqay Dhallinyarada inay kaalin ka qaataan Dhismaha Nabadda ee dalka hooyo, isla markaana xoojiyaan Midnimadooda.

Agaasimaha Hay’adda CCA, Maxamed Cabdi Xsaan “Sandheere” ayaa isagana ka hadlay Munaasabadda Furitaanka Tartankaasi, wuxuuna u mahadceliyey Madaxda Maamulka Degmadda Jowhar, Madaxda Sprt-ga, Ururradda Haweenka ee Labada Gobal iyo guud ahaan dadka ku nool Degmadda Jowhar.

Waxa uu tilmaamay inay Hay’ad ahaan ku faraxsan yihiin Qabashadda Tartankaasi, isagoo xusay in Tartanka loogu talagalay Isdhexgalka Dhallinyaradda iyo in la taageero Dhismaha Dowlad-gobaleedka Hiiraan iyo Sh/dhexe.

Waxa uu tilmaamay inay CCA ka qeyb qaadan doonto Barnaamijyadda Dib-u-heshiisiinta ee Labad Gobal, si loogu gudbo Khilaafyadda Siyaasadeed ee taagan.

G/xigeenka Maamulka Degmadda Jowhar, Maxamuud Sugaal oo isagana ka hadlay Furitaanka Tartankaasi, ayaa u mahad celiyey Madaxda CCA iyo kuwa Labada Gobal, wuxuuna bogaadiyey CCA oo qabanqaabisay Tartanka K/cagta ee loogu magac daray “Tartanka Nabadda iyo Isdhexgalka Goballadda Hiiraan iyo Sh/dhexe”.

Waxa uu ugu baaqay Dhallinyaradda inay la shaqeeyaan Hay’addaha Ammaanka ee ku sugan Gobalka, wuxuuna hoosta ka xariiqay haddii loo midoobo in la gaarayo Nabad iyo Horumar iyo inay Dhallinyaradda fursad u helayaan inay si nabad ah u cayaaraan, lana xoojiyo Isdhexgalkooda.

Tartanka Nabadda iyo Isdhexgalka Goballadda Hiiraan iyo Sh/dhexe ee dhawaan lagu qabtay Garoonka K/cagta ee SNAI ee magaalladda Jowhar waxaa ka qeyb galay Afar Kooxood oo kala ahaa: Balcad FC Team, Beled-weyne FC Tean, Bulo-burde FC Team iyo Jowhar FC Team.

Tartankaasi oo ahaa Hal-mar Is-arag waxaa ku haray Kooxaha Balcad FC Team, Beled-weyne FC, waxaana isugu soo haray Kooxaha Bulo-burde FC Team iyo Jowhar FC Team.

Ciyaarta Kama-dambeysta Labada Kooxood waxaa u soo daawasho tegay in ka badan 500 oo qof, kuwaasi oo soo camiray Garoonka.

Ciyaartaasi waxay 90-kii daqiiqadood ee loogu talagalay ku soo idlaatay Kooxda Jowhar oo ku badisay 2 gool iyo 1 gool.

Kabtanka Kooxda Jowhar FC Team ayaa la guddoonsiiyey Koobka K/cagta ee Tartanka Nabadda iyo Isdhexgalka Goballadda Hiiraan iyo Sh/dhexe ee ay Hay’adda CCA soo qabanqaabisay.

Si kastaba ha ahaatee, Tartankaasi ayaa waxa uu ku soo beegmay, iyadoo ay jiraan Khilaaf Siyaasadeed ka dhex jira qaar ka mid ah Siyaasiyiinta ka soo jeeda Labadaasi Gobal, isla markaana ay Maleeshiyadda Alshabaab weli ku sugan yihiin Degmooyin ka tirsan Labadaasi Gobal.

DAAWO SAWIRADDA FINAALKA EE TARTANKA CCA EE LAGU QABTAY GAROONKA SNAI EE JOWHAR:

©Radio Dalsan