Buuq iyo Sawaxan hareeyay kulankii Maanta ee Baarlamaanka Puntland

Xildhibaanada Baarlamaanka dowlad Goboleedka Puntland ayaa maanta kulan ku yeeshay Xaruntooda magaalada Garoowe, waxaana kulanka shir guddoominayay Guddoomiye Cabdirashid Yusuf Jibril Caw loo ay wehlinayeen ku-xigeenadiisa.

Ajendaha kulanka Baarlamaanka ayaa waxaa uu ahaa Ansixinta wax-ka-bedelka xeerka Ilaalinta iyo maareynta deegaanka Puntland iyo Ansixinta Gobolka cusub ee Raas Casayr ee horay loo oran jiray Gobolka Gardafuu

Inta uu kulanka socday oo aan la ansixin Ajendayaasha ayaa waxaa fadhiga hareeyay Buuq iyo sawaxan, kadib markii dhowr Xildhibaan ay soojeediyeen in Golaha laga raro caasimadda Garoowe, sababo la xiriira amniga.

Soo jeedintaasi ayaa waxaa dood kulul kala hor tegey mid ka mid ah Xildhibaannada Baarlamaanka Maamulka Puntland oo laga soo doorto gobolka Nugaal, iyada oo intaas kadib guddoonku sheegeen in doodda amni ee caasimadda ay mar kale ka doodayaan oo aysan maanta furnayn.

Xildhibaanada Golaha Puntland, ayaa Cod aqlabiyad leh waxa ku meelmariyeen Ansixinta wax-ka-bedelka Xeerka Ilaalinta iyo maareynta deegaanka Puntland, iyaga oo sidoo kalena ansixiyay  Gobolka cusub ee Raas Casayr ee horay loo oran jiray Gobolka Gardafuu.

Dhinaca kale waxa maanta ku ekayd muddo bil ah oo uu furan yahay Dastuurka Puntland, hayeeshee waan-waan ay mucaaridka iyo Xukuumadda ka dhex wadaan Isimmada dhaqanka ayaa loo hakiyey wax-ka-beddelidda dastuurka oo ah ubucda khilaafka siyaasadeed ee Puntland.

About Dalsan Editor

View all posts by Dalsan Editor

Leave a Reply