Taliska Ciidanka Booliska Soomaaliya ayaa faah faahin ka bixiyay Khasaaraha ka dhashay weerarkii qaraxa ku bilowday ee gelinkii dambe ee shalay Al-shabaab ku qaadeen Hotelka Caanka ah ee Elite ee ku yaalla xeebta Liido ee Magaalada Muqdisho.
Afhayeenka Ciidanka Booliska Sidiiq Aadan Cali Doodisho oo warbaahinta kula hadlay afaafka hore ee Hotelka ayaa waxaa uu sheegay in weerarka uu ka dhashay Khasaaro isugu jira dhimasho iyo dhaawac oo soo gaaray dad shacab ah iyo Mas’uuliyiin.
Waxaa uu sheegay Afhayeen Doodisho in weerarka ay ku dhinteen 16 ruux oo 5 ka mid ah ay yihiin ragii weerarka ku qaaday Hotelka, halka ay ku dhaawacmeen 13 qof oo ku sugnaa Hotelka xili uu weerarka dhacayay.
Afhayeenka Ciidanka Booliska ayaa tilmaamay in Ciidanka amniga ay badbaadiyeen dad ku dhow 300 oo qof, kuwaasi oo ku go’doonsanaa hotelka, waxaana dadkaas ku jiray Xildhibaan Cabdullaahi Axmed Nuur oo ah Milkiilada Hotelka iyo Mas’uuliyiin kale.
Dadka ku dhintay weerarka ayaa waxaa kamid ah Agaasimihii xiriirka Gobolada ee Wasaaradda Warfaafinta Xukuumadda Soomaaliya Cabdirisaaq Cabdi iyo dad kale oo u badnaa shacab, isla markaana ku damaashadayay Elite.
War qoraal ah oo lagu faafiyay baraha Internet-ka Al-shabaab ayaa waxaa ay ku sheegteen Mas’uuliyada weerarka ku bilowday qaraxa Ismiidaaminta ahaa ee shalay lagu qaaday Hotelka  Elite ee xeebta Liido ee Magaalada Muqdisho.
