Safiirka Mareykanka ee Soomaaliya Lary Andre ayaa wada hadalo khadka taleefanka la yeeshay Madaxweynayaasha dowlad Goboleedyada, si uu ugu adkeeyo in doorashada Golaha Shacabka lagu soo gabagabeeyo 15 bishan March.
Madaxweynayaasha Dowlad Goboleedyada Galmudug, Koofur Galbeed iyo Puntland ayaa u xaqiijiyay inay xubnaha ka haray doorashada deegaanadooda ay ku soo gabagabeynayaan ka hor 15 March.
Safiirka ayaa sidoo kale la hadlay Madaxweynaha Hirshabelle oo ay ka wada hadleen xaaladda Beledweyne iyo caqabadaha ku xeeran dhameystirka doorashada, waxaana Madaxweyne Guudlaawe u sheegay in aanu lagu soo gabagabeyn karin 15 bishan doorashada xubnaha ku haray Beledweyne, isla markaana u baahan yahay waqti, iyadoo la siiyay waqti dheeri ah
Safiirka Mareykanka ayaa waxaa uu kaloo xaalada Garbahaarey oo ay taallo 16 kursi kala hadlay Madaxweynaha Jubbaland Axmed Madoobe oo isna u sheegay in aanay suura gal aheyn in doorasho lagu qabto deegaankaas oo ay caqabad ka jirto, waxaana Jubbaland ay door bideysaa in meel kale lagu qabto oo aan aheyn Garbahaarey, sida degmada Ceelwaaq oo kale.
Ilo ku dhow Safiirka Mareykanka ayaa sheegaya inuu arrinta Garbahaarey uu kala hadlay Madaxweynayaasha kale ee dowlad Goboleedyada oo ku aadan aragtidooda, waxayna Madaxweynayaasha Galmudug iyo Koofur Galbeed u sheegeen inay muhiim tahay in heshiiskii 17 September la fuliyo oo iyagaba sidii loogu tala galay u dhaqan geliyeen.
