Saraakiisha Ammaanka ee Kenya iyo Goobjoogayaal ayaa sheegay inay Dagaalyahanno ka tirsan Alshabaab jidka u galeen ciiddamo Kenyaan oo gelibinaysay labo bas oo ay dad rayid la soceen duleedka Degmadda Mpeketoni ee Gobalka Lamu.
Goobjooge ayaa u sheegay Wakaalladda Wararka ee AFP inay Alshabaab hub culus iyo garnaylo ku weerareen Kolonyadda ay Milliteriga Kenya gelbinayeen, inkastoo aan la ogeyn inta uu la eg yahay khasaaraha ka dhashay weerarkaasi.
Ilo ku dhow Ciiddanka Ammaanka Kenya ayaa xaqiijiyey weerarkaasi, waxayna sheegeen inuu weli socdo Hwalgalku.
Jidka dheer ee isku xira Lamu iyo Mombasa ayaa laga xayiray gaadiidka, iyadoo ay xiisadi ka taagan tahay.
Bartamihii bishii June ee sannadkii hore, waxay Dagaalamayaasha Alshabaab weerareen Degmadda Mpeketoni iyo Tuullooyinka ku hareeraysan, waxaana weeraradaasi ku geeriyooday ilaa 100 qof.
Habeen hore ayey ahayd, markii ay Dagaalamayaal ka tirsan Alshabaab ay weerareen Deegaanka Barwaaqo ee hoos tagta Degmadda Mandera, waxaana halkaasi ku geeriyootay 13 nin oo Kenyaan ka shaqeysan jirey Kaawooyinka iyo haweeney ka mid ah Soomaalida-Kenya.
© Radio Dalsan
