Wasiirka Amniga dowladda Soomaaliya Cabdullaahi Maxamed Nuur ayaa shegay inuu xilkii ka qaaday taliyaha ciidamada booliska Soomaaliya General Cabdi Xasan Maxamed (Xijaar), kadib markii uu “si bareeer ah iskugu dayay inuu hor is-taago doorashada guddoonka Golaha Shacabka” sida uu ku sheegay bayaan uu soo saaray wasiirku.
Wasiirka ayaa ku eedeeyay taliya ciidamada inuu “si bareer ah ugu milmay arrimaha siyaasadda iyo doorashooyinka dalka” waa sida ku xusan warqadda xilka qaadista taliyaha ee kasoo baxday wasiirka.
Hoos ka akhriso Go’aanka Wasiirka Amniga
Wasiirka Amniga Gudaha
Markuu garowsaday khatarta iyo xasilooni-darada dalku ku sugan yahay ee abuurtay hubanti la’aanta dhamaystirka doorashooyinka oo uu sabab u yahay Taliyaha Boliiska Soomaaliya
Markuu arkay in Taliyaha Ciidanka Boolisku si bareer ah uu iskugu dayay in uu u hor istaago doorashada Guddoonka Golaha Shacabka ee loo balansanyahay maanta oo ah 27 April 2022.
Markuu xaqiiqsaday in si bareer ah Taliyaha Ciidanka Boliiska Soomaaliya ugu milmay arrimaha siyaasadda iyo doorashooyinka dalka asaga oo u adeegaya dano gaar ah.
Markuu helay xogo muujinaya in uu taliyuhu ku howlan yahay falal khatar ku ah bad qabka qaar ka mid ah siyaasiyiinta dalka iyo masuuliyiin sarsare oo xilala muhiim ah kahaya dalka,
Markii ay u cadaatay Wasiirka in talaabooyinka uu qaaday Taliyaha Booliiska Soomaaliyeed ay noqon karaan dambiyo qaran oo u baahan in baaritaan uu ku sameeyo xeer-ilaaliyaha Maxkadamada Ciidamada Qalabka sida.
Waxaa uu xeeriyay Wasiirku
1-Waxaa shaqa joojin lagu sameeyay Taliyaha Ciidanka Booliska Soomaaliyeed, Jeneraal Cabdi Xasan Maxamed, laga bilaabo maanta oo ay taariikhdu tahay 27 April 2022
2-Waxaa si KMG ah hogaanka Ciidanka Booliska usii wadaya Taliye kuxigeenka Ciidanka Booliska Soomaaliyeed.
3- Wasiirku waxaa uu farayaa saraakiisha ciidamada Booliska iyo Nabadsugidda in ay ka fogaadaan kumilanka siyaasada gaar ahaan arimaha doorashooyinka una gutaan waajibaadkooda si dastuuri.
4- Wasiirka Amnigu waxaa ku wargelinayaa Guddoonka KMG ah ee Golaha Shacabka iyo xildhabaanada sharafta leh in ay u madaxbanaan yihiin goorta, Goobta qabashada doorashada Guddoonka Golaha.
