Magaallo-madaxda Gobalka Sh/hoose ee Marka waxay tan iyo Burburkii Dowladnimo kadib noqotay magaallo wehel u noqotay colaado sokeeye iyo kuwo Siyaasadeed.
Magaalladda Marka oo deegaan Xeebeed ah ayaa waxay isku soo martay 5 Maamul, kuwaasi oo midba xilli gaar ah ka talinayey.
Hoggaamiye-kooxeedkii Yuusuf Indha-cadde, Golihii Maxkamadaha, Dowladdii uu Marxuum C/llaahi Yuusuf Madaxweynaha ka ahaa iyo Xarakadda Alshabaab oo Marka maamuli jirtey iyo Qabaa’ilo.
Tan iyo marklii ay Dowladdii Madaxweyne Sheekh Shariif Sheekh Axmed ka saareen Alshabaab magaalladda Marka waxaa gacan-ku-haynteeda ku dagaalamay Beelaha Habar-giri iyo Biyamaal oo ka mid ah Beelaha ku wada nool magaalladda Marka.
Waxaa la sheegaa in Maleeshiyooyinka Qabaa’illadda isku haya Marka inay gacan-saar la kala leeyihiin Alshabaab, AMISOM iyo Dowladda Federalka.
Weriye Hassan Ali Osman “Istiila” oo ka tirsan Radio Dalsan iyo Weriyayaal kale oo ka socday Warbaahinadda ayaa waxay maalintii Axadda ee la soo dhaafay booqdeen magaalladda Marka.
Wuxuuna safarkaasi ku diyaariyey Warbixintan:-
Waxaan 9:00 aroornimo ka dhoofnay Garoonka Diyaaradaha ee Aadan Cadde, iyadoo 30 daqiiqo kadibna waxaan gaarnay Magaalladda Marka oo 90 KM dhanka Koonfureed ka xigta magaalladda Muqdisho.
Markii ay Diyaaradda aan la soconay dul maraysay Marka, waxaan arkaynay Bilicda mag aalladda, waxayna Diyaaradeenna ku degtay Xeradda Milliteriga AMISOM ku leeyihiin Deegaanka Ceel Jallae oo qiyaastii 6 KM u jirta Marka.
Markii aynu gaarnay Ceel-Jaalle kuma aan arag dad badan oo Socoto ah, laakiin, waxaan aragnay Xayawan badan oo qaarkooda cawska dooga raamsanaysay.
Abaanduulaha Qeybta 16-aad ee Hawlgalka AMISOM ka jooga Gobalka Sh/hoose, Kolonel Peter Amola oo Weriyayaasha kula hadlay Ceel-Jaalle ayaa ku sheegay sababaha ay Weriyayaasha ugu marti qaadeen Marka inay tahay sidii ay u beenin lahaayeen Wararka horey loogu sheegay inay Xarakadda Alshabaab gacanta ku hayaan magaalladda Marka.
Kolonel Peter Amola ayaa ii sheegay in goobtu tahay Aag Dagaal, waxaana Askarta joogtay Ceel Jaalle ka muuqday Feejignaan.
Saraakiisha AMISOM lama aysan kulmin Maamulka magaalladda Marka, waxaa Ceel Jaalle noogu yimid Guddoomiyihii hore ee Marka, Yariisow, kaasi oo dadkii la socday u sheegay inuu Saxaafadda la hadli Karin.
Sidoo kale, Madaxdii AMISOM, ee Magaaladda nala joogay, waxaa ay isugu yeereen odayaasha, balse wariyaasha lama aysan kulmi odayaashii ay diyaariyeen madaxda AMISOM.
Waxaan soo aadnay gudaha Marka oo uu Xilligaasi saarnaa Bandow.
Magaalladda waxaa ka muuqday Burbur xooggan, laakiin, marka aad tagto bartamaha Marka waa ka duwan yahay, weyna haawanaysay.
Saraakiisha AMISOM lama aysan kulmin dadka ku nool Marka, waxa keliya ee aad arkayso ayaa ah Askar iyo burbur ka muuqday Saldhig la sheegay inay isaga baxeen Ciiddankii DFowladda.
Saraakiisha AMISOM waxay sheegeen inaysan ogeyn sababaha ku kailifay inay Ciiddanka faarujiyaan Saldhigaas.
Waxaa naloo sheegay inay joogi jireen Ciiddanka Dowladdaa, kuwaasi oo dhowr isbuuc ka hor sababo aan la caddayn Karin iskooda isaga soo huleeelay gudaha Marka, taasi oo u sahashay Dagaalamayaasha Alshabaab inay u soo daba maraan, lana wareegaan Gacan-ku-haynta magaalladda Marka.
Intii aan joognay Marka waxay Saraakiisha AMISOM sheegeen inay nala kulnsiinayaan Odaayaasha Deegaanka, laakiinse, Odayaasha wey diideen inay Suxufiyiinta la hadlaan, iska dhaaf in Sawiro laga qaado, iyagoo u arkay arrintaasi mid masiibo ku noqon karta.
Afhayeenka AMISOM oo aan kula hadalnay intaan safarka ku jirnay waxaan weydiinay Xiriirka ay AMISOM la leeyihiin Dadka Deegaanka iyo Qorshaha AMISOM ee Xilliga Doorashooyinka, wuxuuna jawaabtiisa ku soo koobay inay Ciiddanka AMISOM dadaali doonaan.
Mar aan Telefoonka kula hadlay qof aan Telefoonkiisa hayey oo ku sugan gudaha Marka, waxa uu ii sheegay in qeyb ka mid ah Marka haystaan Alshabaab, halka qeyb kale ka joogaan Ciiddanka AMISOM.
Magaalladda Marka waxaa wada jooga AMISOM, Maamulka K/Galbeed iyo Laba Qabaa’il oo dirirsan.
Xaalladda Marka waxaa laga dareemayaa inay tahay mid aad u khatar badan.
Waxaan gelinkii dambe ka soo ambabaxnay Marka, iyadoo aan dib ugu soo laabanay Garoonka Calaamiga ee Diyaaradaha ee Aadan Cadde.
Si kastaba ha ahaatee, magaalladda Marka ayaa u muuqata Deegaan Colaadeed oo ay dagaalladu ku soo laalaabtaan, iyadoo AMISOM iyo Alshabaab marba koox laga gacan maroojiyo Maamulka magaalladaasi Istaraatijiyadda leh.
I arrived home in Mogadishu from #Merca town, 90km south of the capital #Mogadishu #Somalia pic.twitter.com/GMwrMroldx
— Somalia Live Update (@HassanIstiila) July 19, 2016
WQ: Hassan Ali Osman “Istiila”.
©Radio Dalsan
