Soomaalida Kenya oo lagu cadaadinayo inay shaaciyaan Taageerayaasha iyo Maalgeliyayaasha Alshabaab ee W/bari Kenya

Siyaasiyiinta Soomaalida Kenya ee ka tirsan Dowladda Kenya oo maalmahan booqasho ku joogay magaalladda Garissa ayaa shaaciyey inay ka go’an tahay sidii loo magacaabi lahaa dadka taageersan Alshabaab ee ku sugan magaallooyinka W/bari Kenya.

Mudanaha laga soo doortay Degaanka Fiife, Barre Shiil ayaa sheegay   inaysan dib ugu laaban doonin magaalladda Nairobi, tan iyo inta ay ka dhamaystirayaan Liiska dadka lagu tuhmayo inay maalgeliyaan Alshabaab.

“Dib uguma laaban doono Nairobi ilaa aan ka helno magacyadda dadka laguxiriirinayo weeraradda Alshabaab” ayuu yiri Barre Shiil oo ka hadlay kulan looga hadlayey cabsida ay Alshabaab ku hayaan W/bari Kenya.

Waxa uu intaasi ku daaray inay ka go’an tahay inay shaaciyaan dadkaasi, waa sida uu hadalka u yiri, wuxuuna ugu baaqay Hoggaamiyayaasha Diinta, kuwa Dhaqanka iyo Taliyayaasha Ammaanka iyo Waalidiinta inay soo gudbiyaan xogta ay ka hayaan Alshabaab.

Mudanaha Aqlabiyadda ballaaran ku dhex leh Barlamaanka Kenya, Aadan Ducaale ayaa ka mid ahaa Siyaasiyiintii ka qeyb gashay Shirkaasi,  ayaa tilmaamay inuu caddowga ku dhex jiro dadka Garissa.

Kulankaasi ayaa  yimid Isbuuc kadib, markii uu dhacay weerarkii ay Dagaalamasyaasha Alshabaab ku qaadeen Jaamacadda Garissa, laguna dilay 147-qof, iyadoo 79-kalena lagu dhaawacay.