Falaanqeynta guud ee Doorashadda Madaxtinimadda Galmudug

Wax ka yar 48-saacadood ayaa ka harsan xilliga lagu madalsan yahay inay ku kala baxaan Musharixiinta isku garbinayo xilka Madaxweynaha Dowlad-gobaleedka Galmudug.

Garoonka uu Loolankaasi ka dhacayo ayaa ah Madasha Shirarka ee magaalladda Cadaado, iyadoo uu Musharax kasta rajo weyn ka qabo inuu noqon doono Madaxweynaha la doortay.

Xeeldheerayaasha ayaa waxay u arkaan doorashadaasi mid aad u adag, isla markaana ay Musharixiiinta ku jiraan kuwo isku dheelatiran, isla markaana taageerayaal badan ku dhex leh Bulshadda ku wada dhaqan Goballadda Dhexe.

Marka aad loo dhiraandhiriyo Falaanqeynta Musharaxa ku guuleysan doono xilkaasi, waxaa loo baahan yahay in la eego dabeecadaha ku xeeran Madasha Doorashadda iyo guud ahaan Goballadda Dhexe.

Waxay xaalladdu u muuqataa mid cakiran, waayo waxaa la filan karaa inay Ururka Ahlu Sunna Wal-jameeca qaataan go’aanno dhicis ka dhigi kara Dowlad-gobaleedka Galmudug.

Siyaasiyiinta ayaa rumeysan in weerarkii Ahlu Sunna ku qabsadeen Dhuusa-mareeb iyo Shirweynaha ay Maamulka ugu sameynayaan Goballadda Dhexe inay tahay shax siyaasadeed lagu xanto inuu hagayo mid ka mid ah Musharixiinta ku sugan Cadaado, isla markaana loogu talagalay in gorgortan lagu galo haddii ay xaalladdu isku cakirnaato.

Maamulka Ahlu Sunna waxay sheegeen inay iyagu diyaar u yihiin in ay wada-xaajood ka galaan Shirka ay gogoshiisa dhigeen Dhuusamareeb, laakiinse, waxaa isweydiin mudan xilliga uu wada-xaaajoodku munaasab yahay ?

Xeeldheerayaasha ayaa rumeysan in Wada-xaajoodka Ahlu Suna u gacan-haatinayso inuu muujinayo inay xaalladdu tahay Gorgortan, waxaase habboon in maanka lagu hayo Maahmaahda ah Laabi labo u la’.

Sidaasi oo ay jirto ayaa waxaa aad loo hadal-hayaa Natiijadda Doorashadda Madaxtinimadda ee Galmudug, oo lagu wado inay wax 48-saac kadib lagu kala baxo.

Musharixiinta aadka loo hadal hayo ayaa kala ah Musharaxiinta kala ah Ambassador Axmed Macallim Fiqi, Axmed C/salaam Xaaji ,Jeneral Cabdi Xasan Cawaale Qeybdiid iyo C/kariim Xuseen Guuleed, kuwaasi oo miisaan culus ku leh Siyaasadda Somalia  iyo Deegaanadda Goballadda Dhexe.

Hadal-haynta ugu badan ee ay dadka Reer Cadaado ku qiimeynayaan Doorashaddaasi ayaa waxay ku halqabsadeen in mid ka mid ah afartaasi Musharax uu ku guuleysan doono Doorashadda dhici doono maalinta Sabtiga ee soo socota.

Xeeldheerayaasha dhexdhexaadka ka ah Musharixiinta ayaa rumeysan in labada Musharax ee Axmed Fiqi iyo Axmed C/salaan loo saadaalinayo inay isugu soo hari doonaan Wareegga Kama-dambaysta, inkastoo uu Loolankaasi adkaan doono.

Labada Musharax oo Xilal kala duwan soo qabtay, ayaa waxay yihiin kuwo ka khibrad roon Musharixiinta kale, marka la eego shaxda guud ee lagu qiimeeyo musharixiinta.

Jeneral Cabdi Qeybdiid ayaa isagana la hadal-hayaa inuusan dab yar shidaynin, isla markaana ay suurtogal tahay inuu ku soo baxo, maadaama uu isagu horey u soo galay Tartankii Doorashadda ee Maamulka lagu dhisay Koonfurta magaalladda kala qeybsan ee Gaalkacayo.

Loolan kasta oo lagu tartamo Xilalka, waxay Musharixiinta yihiin kuwo is-eegta, isla markaana mararka qaarkooda heshiis-hoosaad wada galo, si uu midkooda ugu guuleysto Xilkaasi.

Iyadoo taasi jirto, ayaa waxaan shaki ku jirin inay Musharixiinta Madaxtinimadda Galmudug muujin doonaan Isbahaysi hoose iyo Isu tanaasul, si Musharaxa ugu cadad loo taageero, loona muujiyo in loo tanaasulay.

Si kastaba ha ahaatee, natiijadda Doorashadaasi ayaa noqon doonta mid ay qaar ka mid ah Musharixiinta ka biyo-diidaan, waxaase habboon inay Musharixiinta u hambalyeeyaan Musharaxa ku guuleysta Xilkaasi, lana shaqeeyaan.

© Radio Dalsan