Faahfaahin: Ciiddanka Dowladda oo Alshabaab ka saaray Qoryooley.

Gelinkii dambe ee shalay Ciiddanka Dowladda iyo Dagaalamayaasha Alshabaab ayaa ku dagaalamay Degmadda Qoryooley ee Gobalka Sh/hoose.

Alshabaab ayaa la sheegay inay weerar gaadmo ah ku soo qaadeen Degmadaasi, waxayna gudaha u soo galeen xaafado ka tirsan Degmadaasi, sida ay xaqiijiyeen Goobjoogayaal.

Ciiddanka Dowladda ayaa xilligaasi dib u gurtay, balse waxay taageero ka heleen Ciiddanka Hay’adda Nabadsugidda iyo Hawlgalka AMISOM.

Xaalladda Qoryooley ayaa sakayto deggan, waxaana ku sugan Ciiddanka Dowladda, kuwaasi oo bilaabay baaritaano iyo hawlgal lagu sugayo Ammaanka.

Iska horimaadkii shalay waxaa ka dhashay khasaaro isugu jiray dhimasho, dhaawac iyo burbur hantiyeed.

Ciiddanka Dowladda waxay sheegeen in ay 5 Askari kaga geeriyoodeen dagaalkaasi.

Sidoo kale, dhowr qof oo rayid ahaa ayaa la sheegay inay ku geeriyoodeen xabadihii ay labada dhinac isku adeegsadeen.

Dhinaca kale, ma cadda tiradda Alshabaab kaga geeriyootay amaba kaga dhaawacantay dagaalkii shalay ka dhacay gudaha Degmadda Qoryooley oo ku taalla goob Istaraatijiyad leh.

©Radio Dalsan      

 

About Dalsan Editor

View all posts by Dalsan Editor