Sida maanta lagu soo daabacay Wargeyska Asharqal-awsad ee laga leeyahay dalka Sacuudiga, laguna daabaco magaalladda London ee dalka Britain ayaa qoray inay Hoggaamiyayaasha Maleeshiyadda Xuutiyiinta bilaabeen inay qortaan Qaxootiga Afrikaanka ee ku nool Goballadda ay Xuutiyiinta gacanta ku hayaan.
Guddoomiyaha Gobalka Shabwa ee dalka Yemen, Kolonel C/llaahi Al-nasaay ayaa u sheegay WargeyskaAsharqal-awsad inay Madaxda Maleeshiyadda Xuutiyiinta la kulmeen Odayaal ka tirsan Qaxootiga Soomaalida, Kenya, Nigeria iyo kuwa Afrikaanka ee ku nool Koonfurta Yemen.
Waxa uu intaasi ku daray in laga codsaday Guddiga Qaxootiga Afrikaanka ,inay u soo qoraan Dagaalyahanno cusub, si ay uga mid noqdaan Dagaalamayaasha Xuutiyiinta ee dagalladda kula jira Ciiddanka Dowladda Sharciga ee Yemen ee taageeradda ka hela Isbahaysiga Sacuudiga.
Guddoomiyaha Gobalka Shabwa ee dalka Yemen, Kolonel C/llaahi Al-nasaay waxa uu intaasi ku daray in Odayaasha la siiyey Maalgelin Lacageed, si ay Dagaalyahanno cusub uga soo daabulaan dalalkooda, waa sida sheegay Guddoomiyahaasi.
Qaar ka mid ah Qaxootiga Afrikaanka ayaa la sheegay in Tababar Milliteri looga furay Xero ay Xuutitiinta ku leeyihiin Degmadda Bayxaan ee Koonfurta Yemen.
Dhinaca kale, Boqolaal Tahriibayaal Somali iyo kuwa Afrikaan ayaa la sheegay inay maalin kasta gaaraan Xeebaha Gobalka Shabwa ee Koonfurta Yemen oo ay Maleeshiyadda Xuutiyiinta maamulaan.
Tahriibayaasha doonaya inay ku biiraan Maleeshiyadda Xuutiyiinta waxaa marka ay soo gaaraan Xeebaha Shabwa loo gudbiyaa Caasimadda Gobalkaasi ee Cataq, waxayna lacago ka qaataan Shirkadaha Xawaaladaha ee halkaasi ka hawl-gala.
Dhinaca kale, Wargeyska Asharqal-awsad ayaa qoray in maydad badan oo dad Afrikaan ahaa lagu arkay Gobalka Ma’rib, oo ay ku dagaalameen Ciiddanka Dowladda Sharciga ee Yemen iyo Maleeshiyadda Xuutiyiinta.
