Duqii hore ee Muqdisho Taabit Cabdi Maxamed ayaa sheegay in Soomaaliya aysan Xiligaan u baahnayn xifaaltan kooxeed iyo jahawareer Siyaasadeed.
Qoraal uu soo saaray Guddoomiyihii hore Gobolka Banaadir ayaa waxaa uu kaga hadlay dhinacyo badan oo quseeya sisaadda Soomaaliya ee xiligaan, waxaana uu sheegay in lo baahan yahay xal rasmi ah oo ay gaaran madaxda dowlad Goboleedyada iyo Dowladda Dhexe.
Qoraalka uu soo saaray Thaabit Cabdi ayaa u qornaa Sida tan:
Marka la eego halka ay maanta Soomaaliya joogto, ma xamili karto waqti lumin siyaasaddeed, jahwareer doorasho iyo xifaaltan kooxeed. Ummaddeena intaas waa ka baahi badan tahay, waana ka maamuus weyn tahay.
Shirka Muqdisho waa inuu noqdaa midkii gunnaanadi lahaa geedi socodkii shirrarka, doodihii arrimaha doorashooyinka iyo khilaafkii soo jiray, waana inuu xaaladda taagan si waadix ah u go’aamiyaa. Waxa qura ee la qaadan karo waa inuu shirkan kadib dalku doorasho aado, si ay shacabka, xisbiyada iyo cid walba u qaadato kaalinteeda.
Waxaan boggaadineynaa in dhammaan dhinacyadu aqbaleen iney Muqdisho isugu yimaadaan, waxaana ku baaqeynaa in danta guud loo tanaasulo oo aan waqti kale laga lumin shacabka Soomaaliyeed ee indhaha iyo dhaggaha ku haya shanqarta siyaasiyiinta.
Wixii hadda kadib sii jiitama waxaa ay ka marqaati kici doonaan damac liita iyo mas’uuliyad darro, waxaana ceebteeda qaadan doonta ciddii fasha.