Madaxtooyada Somaliland ayaa  waxa ay ka hadashay qaraxii Xalay Ka Dhacay gudaha caasimadda gobolka Togdheer ee Magaalada Buuhoodle,kaas oo geystay khasaaro isugu jira dhimasho iyo dhaawac.
Madaxweynaha Soomaaliland Muuse Biixi Cabdi  ayaa tacsi u diray dadkii qaraxaasi ku geeriyooday, isaga oo caafimaad degdeg ah u rajeeyey dadkii dhaawacmay, waxana uu hay’adaha ammaanka faray inay baaritaan degdeg ah ku sameeyaan…
Madaxweynaha Somaliland, Mudane. Muuse Biixi Cabdi isagoo ku hadlaya magaciisa, ka dawladda iyo ka shacbiga Somaliland, waxa uu tacsi u dirayaa, shacbiga Buuhoodle, iyo dhamaan shacbi weynaha reer Somaliland, gaar ahaan qoysaska, ehellada, qaraabada, asxaabta ay ka baxeen dadkii ku geeriyooday qaraxii xalay ka dhacay Magaalo madaxda gobolka Togdheer ee Buuhoodle ee ay ku naf waayeen muwaadiniin reer Somaliland ah sida lagu yiri Warsaxaafadeed ka soo baxay Madaxtooyada Soomaaliland.
Waxaanu Madaxweynuhu marxuumiinta ku geeriyooday qaraxaasi Alle uga baryay inuu naxariistii janno ka waraabiyo, intii ku dhaawacantayna Alle caafimaad taama ka siiyo kana dulqaado dhibta iyo xanuunka soo gaaray.
Sidoo kale Madaxweynuhu waxa uu laamaha amniga ku adkeeyey inay baaritaan buuxa ku sameeyaan siday wax u dhaceen, gacantana ku soo dhigaan ciddii ka danbaysay falkaasi argagaxa ku abuuray bulshada Buuhoodle.
Xukuumadda Somaliland, marnaba ma aqbalayso, umana dul-qaadan doonto cid kasta oo isku dayda waxyeello, dhibaato iyo falal amni-darro ah inay ku qaaddo shacbiga iyo dalka Jamhuuriyadda Somaliland.
Si kastab qarixii Ismiidaminta ahaa ee xalay ka dhacay Magalada Buuhoodle ayaa sababay dhimashada mas’uuliyiin saraakiil iyo shacab intaba,kuwaas oo qaarkood ka tirsanaa Maamulka Khaatuma.
