Waxaa baaqday shirkii la filayay in muqdisho uga furmo Madaxda Dowladda Federaalka Soomaaliya iyo labada Madaxweyne ee Jubbland iyo Puntland, waxana qorshuhu ahaa in shirku uu si toos ah u billawdo habeenimadii  xalay ahayd.
Sababta shirkaasi uu u baaqday ayaa waxaa kasoo baxaya Warar kala duwan, waxaana la sheegay in maamulka Jubbaland ay shuruud adag ku xireen Billabashada shirka, Madaxweynaha Maamul Goboleedka Jubbland Axmed Maxamed Islaam Axmed Madoobe ayaa la sheegay in iuu dowladda ka dalbaday in Ciidanka ay gaysay Gobolka Gedo ay ka saarto, taasi oo la sheegay in la isku mari waayay.
Wararku waxaa intaas ay ku darayaan in tan iyo xalay ay socdeen shirar hoose oo lagu doonayo in shirka Maanta la amba-qaado, waxaana Madaxda Muqdisho ku kulansan ay wadaan wadatashiyo iyo shirar gooni gooni ah.
Shirka xalay Baaqday ayaa waxaa mas’uul ka ahaa Jubbaland sida wararku sheegayaan, balse wali ma jiro wax mowqif cad ah oo maamulka Puntland kasoo baxay, iyadoo aan ilaa hadda la soo warin in Puntland dhankeeda ay ka jiraan wax shuruudo ah oo ay ku xireen billaabashada shirka.
Dowladda Soomaaliya ayaa war kasoo baxay shalay waxaa lagu sheegay in shirku si rasmi ah uu u billaaban doono, waxaana warka kasoo baxay madaxtooyada uu sheegayay in habeenimadii xalay ahayd uu furmayo shirkaas, dhammaan dhinacyada ka qayb galayana ay diyaar u yihiin, balse xalay ayay wax walba is beddeleen.
Labada maamul oo iyagu shirka horay u dalbaday kadib kulan ay isugu tageen magaalada garoowe ee xarunta Mamamul Goboleedka Puntland ayaa haatan u muuqda in dhankooda ay ka imaanayaan shuruudo sii adkeyn kara wada hadalka.
Waxaana hadda socda dadaaladii ugu danbeyay ee shirkaas dib loogu amb-qadayo, maamulka jubbaland wali kama taanaasulin go’aankii ay xalay shirka ku baajiyeen, dhinac dowladdana lama oga tallaabada ay qaadi doonto maaddaama shirka ay shuruud adag hortallo, walina dhinacyadu waxa ay wadaan wadatashiyo uu dhinac waliba dib isugu laabanayo.
