Galabta ayaa waxaa Magalada Garoowe ee Xarunta Gobolka Nugaal ka furmay markii ugu horeysay Shirka Golaha Wasiirada xukuumadda uu hoggaamiyo Ra’iisul Wasaare Wasaare Xasan Cali Kheyre.
Shirka oo ka dhacaya Xarunta Wasaaradda Maaliyadda Puntland,ayaa waxaa shir guddoominaya Ra’iisul Wasaare Kheyre,waxa sidoo kale goob joog ka ah Ra’iisul Wasaare ku xigeenka dalka iyo Xubnaha Golaha Wasiirada Soomaaliya.
Shirka ayaa qorshuhu ahaa in uu furmo Saakay Barqadii balse uu dib u dhacay khilaaf jirey,waxana shir deg deg ah oo lagu xaliyey khilaafkaas yeeshay Xubnaha Golaha Wasiirada ee Puntland ku metelaya dowladda Federaalka iyo Madaxweyne Cabduweli Maxamed Cali Gaas.
Kulanka golaha Wasiirada ayaa haatan waxa uu ka socdaa Xarunta Wasaaradda Maaliyadda Puntland,waxana la filayaa in Saacadaha soo socda laga soo saaro qodobadii ka soo baxa.
Waa markii labaad ee shirka Golaha Wasiiradda Soomaaliya lagu qabto meel ka baxsan Caasimadda dalka Soomaaliya ee Muqdisho,iyada oo xukuumadda hadda jirta ay sheegtay in dhammaan Xarumaha Maamul goboleedyada lagu qaban doono.
