Qaar ka mid ah Shaqaalihii Safaaradda Saldanada Cummaan ku lahayd magaalladda Muqdisho xilligii Dowladdii Kacaanka ayaa sheegay inay ku nool yihiin daruufo adag, isla markaana aysan haysanin awood ay ku maareeyaan qoysaskooda.
Adan Idris Cusmaan iyo C/kariim Sheekh Maxamed Sheekh Xasan oo ka mid ah Shaqaalihii Safaaradda Cummaan oo la soo xiriiray Idaacadda Dalsan ayaa sheegay inaysan wax deeq ah ka helin Hay’addaha Samafalka ee Cummaan ee haatan Kaalmooyinka ka qeybinayo magaalladda Muqdisho iyo qeybo ka mid ah dalka Somalia.
Aadan Idris ayaa tilmaamay inay Safaaradda Cummaan ugu war dambeysay intaysan burburin Dowladdii Maxamed Siyaad bilowgii sannadkii 1991-kii, xilligaasi oo ay Safiirka iyo Diplomaasiyiintii Safaaradda ka qaxeen Somalia.
Dhinaca kale, C/kariim Sheekh Maxamed Sheekh Xasan ayaa isagana sheegay inuu Safiirka Cummaan dhowr bilood ka hor booqasho ku yimid magaalladda Muqdisho, isla markaana uu sheegay inay Safaaraddii ka furan doonaan agagaarka Hotelkii Curuba ee magaalladda Muqdisho.
Si kastaba ha ahaatee, cabashadda shaqaalahaasi ka hawlgeli jirtey Safaaradda Cummaan ayaa ku soo beegantay iyadoo ay Diplomaasiyiin iyo Hawlwadeenno ka tirsan Hay’addaha Samafalka ee dalka Cummaan socdaa gargaar Aadminimo u qeybiyaan dadka tabaalaysan iyo kuwa Barakacayaasha ee ku nool magaalladda Muqdisho.
