Gaari laga soo buuxiyey waxyaabaha qarxa ayaa waxa duhurnimaddii maanta lala beegsaday Maqaayad ku taalla dhabarka dambe ee Dhismaha Maamulka Gobalka Banaadir (Ufficio Governo) ee Degmadda Xamar-weyne ee magaalladda Muqdisho.
Qaraxaasi oo ka dhacay wejiga hore ee Maqaayadda Alhindi ayaa waxaa ku geeriyooday 5 qof, iyadoo 7 kalena ku dhaawacmeen, kuwaasi oo dhamaantooda rayid ahaa.
Afhayeenka Maamulka Gobalka Banaadir, C/fataax Cumar Xalane ayaa Saxaafadda u sheegay in qaraxaasi lala beegsaday Maqaayad ay dad rayid ah ka qadeynayeen.
Dhinaca kale, Alshabaab ayaa sheegatay qaraxaasi, waxayna tilmaameen inay la beegsadeen Mas’uuliyiin ka tirsan Hay’addaha Dowladda oo ka cunteynaysay Maqaayadaasi.
Dorraad ayey ahayd, markii qarax noocan oo kale lala soo beegsaday Xilliga Qadada Maqaayadda Rajo oo ku taalla Xaafadda Bayxaani ee Degmadda Shibis.
Qaraxaasi waxaa ku geeriyootay dhowr qof oo rayid ah oo ay ku jireen Oday naafo oo miis yar ku lahaa halkaasi iyo ciyaalka nadiifiya gaadiidka ay wataan dadka ka cunteeya Maqaayadaasi.
©Radio Dalsan
