Ra’iisul Wasaaraha Xukuumadda Federaalka Soomaaliya ee xilgaarsiinta Maxamed Xuseen Rooble ayaa Caawa magacaabay Guddiyada doorashooyinka heer Federaal, heer Dowlad Goboleed iyo Guddiga Xalinta Khilaafaadka.
Wareegto kasoo baxay Xafiiska Ra’iisul Wasaare Rooble ayaa lagu magacaabay Guddiyada Doorashooyinka, isla markaana lagu la shaaciyay magacyadooda, iyada oo wax ka bedel lagu sameeyay.
Ra’isul Wasaare Rooble iyo Guddiga heer Wasiir ee uu u xilsaaray xaqiijinta ergooyinka waxa ay sameeyeen dadaalo kala duwan, si loo dhageysto cabashooyinka laga soo gudbiyay Guddiyada doorashooyinka.
“Iyada oo la tixgalinayo Halbeegga la dajiyay Hishiiskii 17ka September ee sifooyinka looga baahan yahay qof ka mid noqonaya Guddiyada Doorashooyinka ,waxa marka ugu horreysay liiska laga saaray 34 xubnood oo ka mid ahaa 67da xubnood oo cabasho laga keenay . Waxa lagu celiyay dhinacyadii ay markii hore ka yimaadeen si loo soo badalo xubnahaas” ayaa lagu yiri Qoraal kasoo baxay Xafiiska Rooble.
Sidoo kale Qoraalkaan lasoo saaray ayaa waxaa intaas lagu sii daray “Muddo kadib dhamaan Dowlad Goboleedyada iyo Somaliland waa ay soo gudbiyeen liisaskii wax ka badalka lagu soo sameeyay ,si kala hufid hor leh xubnihii la soo badalay waxa laga helay 6 xubnood oo aan buuxin shuruudaha looga baahan yahay xubnaha guddiga,tani ayaa waxa ay ka dhigeysaa liiska laga saaray guddiyada 40 xubnood”.
Hoos ka Akhriso dhammaan Magacyada xubnaha Guddiyada doorashooyinka oo dhammeystiran.
