Ra’iisul Wasaare Xamse Barre oo kulan la qaatay ku-xigeenka Wakiilka Q/Midoobay

Ra’iisul Wasaaraha Xukuumadda Jamhuuriyadda Federaalka Soomaaliya, Xamse Cabdi Barre ayaa saaka dib ugu laabtay Magaalada Caasimadda ah ee Muqdisho, kadib markii uu shalay safar ku tegay Magaalada Baladweyne ee Xarunta Gobolka Hiiraan.

Ra’iisul Wasaare Xamse ayaa u kuur-galay xaaladda abaareed ee ka jirta Hiiraan, isla markaana waxaa uu kulamo lasoo qaatay Madaxweynaha Hirshabeelle iyo ku-xigeenkiisa oo uu kala hadlay howlgalada ka dhanka ah Al-shabaab ee socda.

Sidoo kale wuxuu Ra’iisul Wasaaraha kormeer ku tegay isaga iyo Madaxweyne Cali Cabdullaahi Xuseen Guudlaawe xerooyinka barakacayaasha ee ku yaala Magaalada Baladweyne.

Madaxweynaha iyo Raisul Wasaaraha ayaa u kuurgalayay xaaladaha ay ku nool yihiin barakacayaashaan isugu jira kuwa kasoo barakacay abaaraha baahsan ee ka jira deegaanada Hirshabeelle iyo qoysaskii kasoo barakacay deegaanka teedaan.

Dhinaca kale Ra’iisul Wasaaraha Xukuumadda Federaalka Soomaaliya ayaa saaka markii uu dib u soo laabay Garoonka diyaaradaha Aadan Cadde kulan kula qaatay Ku-xigeenka Wakiilka gaarka ah ee Xoghayaha Guud ee Qaramada Midoobay, Anita Kiki Gbeho

Kulanka Ra’iisul Wasaare Xamse Cabdi Barre iyo ku-xigeenka Wakiilka Qaramada Midoobay ayaa waxaa looga hadlay xoojinta wadashaqeynta xukuumadda iyo hay’adaha Qaramada Midoobay gaar ahaanna arrimaha gargaarka iyo taakuleynta dadka abaartu saameysay.

About Webmaster

View all posts by Webmaster
%d bloggers like this: