Madaxweynaha dowlad Goboleedka Galmudug Axmed Cabdi Kaariye oo safar shaqo ku jooga Magaalada Istanbuul ee dalka Turkiga ayaa xalay waxaa halkaas loogu sameeyay xaflad ballaaran oo lagu soo dhaweeynayo.
Xaflada ayaa waxaa soo qaban-qaabiyay Jaaliyadda Soomaaliyeed ee Turkiga, waxaana kasoo qeyb galay Madaxweynihii hore ee Galmudug Cabdikariin Xuseeen Guuleed iyo dadweyne farabadan oo lagu casuumay.
Madaxweyne Qoorqoor oo Khudbad ka jeediyay Xaflada ayaa waxaa uu ka hadlay wejiga saddexaad ee Shirka Madaxda dowladda Federaalka Soomaaliya iyo kuwa Maamul Goboledyada dalka maalmaha soo socda uga furmayo Magaalada Dhuusamareeb.
Waxaa uu sheegay in shirkaas uu yahay mid muhiim ah, isla markaana laga wada sugayo Natiijada kasoo bixi doonta, isagoo dalbaday in laga fogaado wax kasta oo lagu fashilin karo Shirka Dhuusamareeb.
“Waxaan u mahad celinayaa reer Galmudug, gaar ahaan bulshada Caasimadda ee wax ka yar 2 maalmood ku marti qaaday wufuuda Faderaalka oo ka badnaa kun qofood, iyadoo magaaladu aysan laheyn guriyo waaweyn iyo Hodheelo” ayuu yiri Qoorqoor.
Madaxweynaha Galmudug Axmed Cabdi Kaariye Qoorqoor ayaa maalmo kahor safar shaqo ugu ambabaxay dalka Turkiga, isagoo halkaas kulamo kala duwan kula qaadan doona Mas’uuliyiin iyo xubno kale.