Sanduuqa Dhexe ee Waxqabadka Degdegga ee hoos taga Hay’adda QM ugu qaabilsan Cuntada iyo Beeraha ee FAO ayaa sheegay inay 22 million oo Dollar ugu talagaleen Xaalladda Degdegga ee wax looga qabanayo Abaaraha iyo Macluusha ka taagan qeybo ka mid ah Somalia.
Hadal ka soo baxay Xarunta Dhexe ee Hay’adda FAO ku leedahay Caasimadda dalka Talyaaniga ee Rome ayaa lagu sheegay in Kharajkaasi loogu talagalay in lagu caawiyo Bulshooyinka Reer Guuraaga ah ee ay Ceelasha ka qalaleen, Xoolihiina ka le’deen, isla markaana aysan u soo go’in wax Dalag ah oo ay beerteen.
Madaxa Xafiiska QM ee Isku-xirka Hawlaha Samafalka Aadminimadda, Stephen O.Brien ayaa sheegay in Kaalmada ay Hay’adda FAO bixisay qeyb ka tahay dadaalka lagu doonayo in looga hortago Xaallad Aadminimo oo Khatar ah.
Waxa uu intaasi ku daray in FAO si degdeg ah u badbaadin doono Nolosha Dadka Beeraleyda iyo Xoolaleyda, kuwaasi oo Kaalmo dheeraad ah ka helayo Deeq-bixiyayaasha.
QM waxay horey u shaacisay inay Macluul Daran ka jiraan dalalka Somalia, South Sudan, Yemen iyo Nigeria.
Bishii la soo dhaafay, Madaxweyne Farmaajo ayaa ku dhawaaqay inay Somalia ka jirto Masiibo Qaran, iyadoo dadka ay macluusha soo food saartay gaarayaan 3 million oo qof.
QM waxay ka digtay inay saddexda bilood ee soo socota ay Cunto yaraan soo food saari doonto 6.2 million oo qof oo Soomaali ah.
Waa Macluushii 3-aad ee Somalia ka dhacda 25-kii sanno ee la soo dhaafay, iyadoo macluushii ugu dambaysay oo dhacday sannadkii 2011-kii ay ku geeriyoodeen 260,000 oo Soomaali ah.
©Radio Dalsan
