Guddoomiyaha Guddiga Midowga Afrika, Mahmoud Ali Youssouf, ayaa si diirran u soo dhaweeyay hadalka Madaxweynaha Faransiiska, Emmanuel Macron, oo ku dhawaaqay in dowladdiisu damacsan tahay inay si rasmi ah u aqoonsato Dowladda Falastiin.
Guddoomiyaha ayaa sheegay in go’aankan uu la jaanqaadayo mowqifka taariikhiga ah ee Midowga Afrika, kaas oo si cad loogu muujiyay Kalfadhigii 38aad ee Golaha Midowga Afrika ee dhacay 15–16 February 2025 magaalada Addis Ababa, halkaas oo mar kale lagu adkeeyay in dadka Falastiiniyiinta ay leeyihiin xaq aan laga laaban karin oo ku saabsan is-maamul iyo dowlad madax-bannaan.
“Tallaabadani waa mid muhiim ah oo u gogol xaaraysa xalka waara ee khilaafka Falastiin iyo Israa’iil, iyadoo lagu saleynayo shuruucda caalamiga ah iyo qaraarrada Qaramada Midoobay,” ayuu yiri Guddoomiye Youssouf.
Wuxuu intaas ku daray in Midowga Afrika ay weli ku taagan tahay taageerada buuxda ee aragtida laba dowladood, si Falastiin iyo Israa’iil ay ugu wada noolaadaan nabad iyo amni. Sidoo kale, wuxuu ugu baaqay dalalka kale ee caalamka inay qaataan go’aanno la mid ah si loo garab istaago rabitaanka sharciga ah ee shacabka Falastiin.
