Maxkamadda The European Court of Human Rights oo dib u eegi doonta dacwado loo haysto Soomaali lala xiriirinayo qaraxyo ka dhacay London

Afar Somali oo ay Maxkamad ku taalla London horey xukunno ugu riday doorkii ay ku lahaayeen qaraxyo 10-sanno ka hor ka dhacay magaalladda London ayaa la sheegay inay Kiiskooda eegi doonto Maxkamadda Europe ugu qaabilsan Xuquuqda Aadanaha (The European Court of Human Rights).

Saddex ka mid ah Eedeysanayaasha oo lagu kala magacaabo Ramzi Mohammed, Muktar Said Ibrahim iyo Yassin Omar ayaa horey min 40 sanno loogu xukumay, kadib, markii lagu soo oogay inay ku fashilmeen isku-day ay ku doonayeen inay ku qarxiyaan Shabakadda Gaadiidka ka shaqeeya magaalladda London.

Dhallinyaradaasi ayaa la sheegay inay ku fashilmeen qorshahaasi oo ay maleegeen labo toddobaad kadib, markii ay London ka dhaceen qaraxyadda bishii July 7-dii ee sannadkii 2005-tii.

Eedeysanayaasha ayaa sheegay inaysan si caddaalad ah u dhicin xukunka lagu riday iyo qoraalladii laga qoray si loogu lifaaqo dacwadahooda.

Eedeysane kale oo lagu magacaabo Ismail Abdirahman oo lagu eedeeyey inuu saaciday mid ka ah Eedeysanayaasha ayaa sheegay inaysan si xaq ah u dhicin dacwadiisa.

Waxa uu sheegay in Markhaati ah looga qoray Qoraalka Dacwadda, balse, markii dambe laga dhigay Eedeysane la socday Eedeysanayaasha kale.

Dhinaca kale, Maxkamadda Sare ee Europe ugu qaabilsan Xuiquuqda Aadanaha (ECHR) ee Xarunteeda Dhexe ku taallo magaalladda Strasbourg waxay bishii December ee sannadkii hore ku gacan-sayrtay cabashadda Eedeysanayaasha ku sheegeen inaysan helin Xukun Caadil ah.

Dhinaca kale, Maxkamadda ECHR ayaa shalay sheegtay inay Golaha Xeer-beegtida Sare ee Maxkamadda dib u eegi doonaan Kiiska Eedeysanayaasha, iyadoo ay qoraallo cabasho ah ka heleen labo ka mid ah Eedeysanayaasha oo lagu kala magacaabo Yassin Omar iyo Ismail Abdirahman.

Tallaabadaasi ayaa u muuqata mid lagu doonayo inay Kooxo Garsoorayaal kala duwan mar kale dhegeystaan Kiiskaasi.

Qaraxyadda lagu eedeynayo Afarta Eedeysane ayaa yimid labo toddobaad kadib, Is-qarxintii bishii July 7-dii ee sannadkii 2005-tii ka dhacay magaalladda London, kuna geeriyoodeen 52-qof.

Is-qarxintaasi waxaa geystay nin u dhashay Britian, oo ay u dhixi jirey Carmalladda Cad ee sida xooggan ay Hay’addaha Sirdoonka Reer Galbeedka u baadi-goobayaan.