Madaxweynaha Jamhuuriyadda Federaalka Soomaaliya Xasan Sheekh Maxamuud oo Khudbad ka jeedinayay kala fadhiga 2aad ee Golaha Baarlamaanka Federaalka Soomaaliya ayaa sheegay markii uu xilka la wareegay uu la kowsaday laba xaaladood oo kala daran: Abaaro saameeyay in ka badan 7 Milyan oo qof, iyo AL-Shabaab.
Madaxweynaha ayaa boggaadiyay howlahii uu soo qabtay Barlamaanka kalfadhigii hore, oo ay ugu horreyso doorashooyinkii, guddoonka, madaxweynaha iyo kalsooni siinta ra’isulwasaaraha iyo xukuumadda iyo Sidoo kale dhisitaankii guddiyadii joogtada ahaa iyo xubnahii ku matali lahaa barlamaanada caalamka.
Waxaan sidoo kale, bogaadinayay xubnaha golayaashan ee u guntaday inay garab istaagaan ciidamada qalabka sida iyo shacabka soomaaliyeed, Waxaana uu intaa ku daray in Baarlamaanku ay shacabka Soomaaliyeed hormuud ugu noqodeen macnaha dhabta ah ee mataalaadda shacabka.
Xasan Sheekh ayaa mar uu ka hadlayay dagaalka AL-Shabaab waxaa uu yiri “maanta Dalkeena iyo dadkeennuba waxay ku sugan yihiin meel aan ka noqosho laheyn, meel guuldarradu aanay boos uga bannaaneyn. Waxaan go’aansannay inaan u guntanno dagaalka dalka looga sifaynayo ALShabaab. Waan soo waayay jid aan ahayn in aan difaacno karaamadeenna , islaanimadeena iyo qaranimadeena. Dalka iyo dadku waxay inooga baahan yihiin xilgudasho dhammeytiran oo ah in aan dhinac uga soo wadajeesano halka cadaw ee Soomaaliyada maanta; waa in aan isku garabsiino shacab iyo dowladba sidii aan Dalka oo dhan aan uga xoreyn laheyn cadawagaas”
