ASCWW, Mudanayaal iyo Marwooyin,
Waxaan ku faraxsanahay inaad maanta nala wadaagtaan Munaasabadda Qiimaha leh ee loogu dabaal degayo Sannad-guuradda 4-aad ee ka soo wareegtay markii dhidibada loo taagay Radio Dalsan.
Bishii April 2-dii ee sannadkii 2012-kii ayaa la asaasay Shabakadda Dalsan Media Network, oo ay Idaacadda Radio Dalsan udub-dhexaadka Koowad u tahay.
Taabagelinta Asaaska Idaacadda Dalsan waxa laga soo maray Marxallad Adag, waxayna Tartan la gashay Idaacadihii ka horreeyey, waxayna Idaacadda haatan ka mid tahay Warbaahinadda Madaxa-bannaan ee safka hore kaga jira Horumarinta Saxaafadda Somalia.
Mudanayaal/Marwooyin, Radio Dalsan waxa laga dhegeystaa Goballadda Somalia iyo Caalamka oo idil, waxay Hawada ku jirtaa 18 saacadoo habeen iyo maalin, waxaana Istuudiyaal FM ku rakibnay magaallooyinka Jowhar, Baydhabo iyo Cadaado.
Waxaa kale oo Idaacadda laga dhegeystaa Dayax-gacmeedka Satellite-ka iyo Warbaahinadda kale ee ay Bulshadda ku wada xiriiraan, sida Twitterka iyo Facebook.
Macaamil ballaaran ayey Radio Dalsan ku yeelatay Caalamka, waxaana Cilmi-baaristii ugu dambeysay ee aynu ku qiimeeynay Heerka Dhegeystayaasha Radio Dalsan, waxaa inoo soo baxay inay Dhegeystayaal tiradoodu u dhexeyso 3 ilaa 4 million oo qof si toos ah ugu xiran yihiin Dhegeysiga Dalsan Media iyo Websaytka Idaacadda ee cinwaankiisu yahay www.radiodalsan.com
Waxaa kaloo jirta in Radio Dalsan si toos ah looga dhegeysan karo Telefoonadda Mobile-adda, iyadoo Dhegeystayaal ku nool Maraykanka iyo Britain ku caana-maaleen Hab-dhegeysiga Radio Dalsan.
Mudanayaal/Marwooyin, Waxaa lagu guuleystay Hadafka laga lahaa Asaaska Idaacadda ee ahaa inay Ummadda ka haqabtiraan Akhbaaraadka Gudaha iyo Dibedda iyo Barnaamijyadda ku salaysan Nabadaynta, Dib-u-heshiisiinta iyo Wacyi-gelinta Ummadda Soomaaliyeed.
Waxaa kaloo lagu guuleystay inay Idaacadda albaabadda u furto inay rafiiq la noqdaan dhamaan Qeybaha Bulshadda, sida Mas’uuliyiinta Qaranka, Siyaasiyiinta, Waxgaradka, Dhallinyarada, Haweenka iyo in fursado la siiyo Dadka aan Codka lahayn si loo maqlo Bareerahooda ku aadan Nabadda iyo Dib-u-heshiisiinta.
Radio Dalsan waxa kale oo uu fursado siiyaa Barakacayaasha iyo Dadka ku dhibaataysan Somalia ee doonaya in laga caawiyo Marxalladaha Caafimaadka iyo Nololeed ee ay ku nool yihiin.
Mudanayaal/Marwooyin, Madaxda Warbaahinta Dalsan Media waxaa u qorsheysan in Telefishin casri ah lagu soo kordhiyo Hawlaha Dalsan Media Insha Allaahu, waxaana la rajeynayaa inuu Telefishinka hawlgalo ka inta aan la gaarin Sannad-guuradda soo socota ee Aasaaska Radio Dalsan.
Waxaa kale Jadwalka Qorshe-hawleedka noogu jira in Radio Dalsan laga dhegeysto Mobile-adda Apple, iyadoo lagu salaynayo Barnaamijyadda Apple Store.
Mudanayaal/Marwooyin, Radio Dalsan waxay diyaarinaysaa Barnaamijyo Khaas u ah Doorashooyinka dalkeenna ka dhici doonta dabayaaqadda sannadkan, waxayna Musharixiinta Madaxtinimadda si siman ula wadaagi doonaan Radio Dalsan Qorshahooda Musharxnimo iyo Ajendayaasha Siyaasadda, Nabadda, Bulshadda iyo Horumarka ee ay dalka ku hagi doonaan haddii ay ku guuleystaan Doorashadda.
Hadafka asaasiga ee Radio Dalsan ayaa ah Dhexdhexaadnimo, dhowrista Xorriyadda Hadalka, Xuquuqda Aadanaha, Wacyi-gelinta Bulshadda, Taageeridda Nabaddaynta, Dib-u-heshiisiinta iyo Horumarinta Danaha Dadka iyo Dalka Somalia.
Mudanayaal/Marwooyin ugu dambeyntii, Radio Dalsan waxaa ka hawlgala Shaqaale Xirfadley ah oo wax badan ku soo kordhiyey Tayadda Idaacadda iyo qancinta Macaamiisha la saan-qaada Radio Dalsan.
Mudanayaal/Marwooyin waa ku mahadsan tahay sida aad noola wadaagaysaan Farxadda Sannad-guuraddii 4-aad ee Radio Dalsan, Hambalyo-Hambalyo.
©Radio Dalsan
