Warar dheeraad ah ayaa laga helayaa qarax sababay dhimasho iyo dhaawac oo Maanta ka dhacay wadada dheer ee xiriirisa magaalada Muqdisho iyo degmada Afgooye gaar ahaan agagaarka deegaanka Xaawa Cabdi ee duleedka magaalada.
Qaraxa oo ahaa miino dhulka lagu aasay ayaa waxaa uu qabsaday gaari nooca dadweynaha raacaan ee Hoomeyda, isla markaana ay saarnaayeen dad shacab ah, wuxuuna gaariga qaraxu qabsaday, xilli uu marayey deegaanka Xaawa Cabdi.
Inta la xaqiijiyey 8 ruux oo shacab ahaa ayaa ku dhinta qaraxa, halka dad kalena oo saarnaa gaariga ay dhaawacyo soo gaareen, kuwaasi oo durbadii loola soo cararay Isbitaalo ku yaalla magaalada, si xaaladdooda Caafimaad loogu dabiibo.
Dad goobta ka agdhawaa ayaa gurmad deg deg ah u sameeyay dadkii waxyeelada kasoo gaartay qaraxa khasaaraha dhaliyey, sidoo kalena waxaa burburay gaariga uu qaraxu qabsaday ee Hoomeyda ahaa, sida ay muujinayeen Sawirro laga qaaday goobta.
Illaa iyo hadda lama oga Lama in qaraxa lala damacsanaa gaariga uu qabsaday iyo inuu bartilmaameedka meel kale ahaa, iyadoo wadadaas ay inta badan isticmaalaan Ciidamadda dowladda Federaalka iyo kuwa midowga Afrika ee ATMIS.
