Guddoomiye ku-xigeenka labaad ee Golaha Shacabka Baarlamaanka Federaalka Mahad Cabdalla Cawad ayaa ka hadlay dagaal xoogan oo saakay Ciidanka Galmudug, Dad shacab ah iyo Al-shabaab ku dhexmaray deegaan ka tirsan Gobolka Mudug.
Mahad Cawad oo qoraal soo saaray ayaa waxaa uu sheegay in dagaal Culus uu ka dhacay deegaanka Shabeelow ee hoostaga Degmada Bacaadweyne, isla markaana dagaalkaas uu ka dhashay Khasaaro isugu jira dhimasho iyo dhaawac.
Guddoomiye Cawad ayaa sheegay in deegaanka Shabeelow ay Al-shabaab ku xasuuqeen dad shacab ah oo guryahooda joogay, isagoo caddeeyay in halkaas lagu dilay 9 qof, halka ay ku dhaawacmeen 5 qof oo kale.
Dowladda Federaalka Soomaaliya iyo Galmudug ayuu Mahad Cawad ugu baaqay inay xasuuqaas ka bixiyaan Jawaab Deg deg ah, isla markaana shacabka ku dhaqan deegaanka Shabeelow laga difaaco Al-shabaab, waa sida uu hadalka u dhigay.
“Waxaan tacsi u dirayaa ehelada dadka lagu xasuuqay deegaanka Shabeelow Gobolka Mudug. Xasuuqa ay Shabaab ka geysteen deegaankaas waxaa lagu laayay shacab ugu yaraan 9 qof ah laguna dhaawac 5 qof oo guryahooda jooga. DFS iyo maamulka Galmudug jawaab degdeg waa inay ka bixiyaan falkaas”ayuu yiri Mahad Cawad.
Si kastaba Al-shabaab ayaa waaberigii hore ee saakay weerar ku qaaday Saldhig Ciidanka Galmudug ay ku leeyihiin deegaanka Shabeelow, waxaana weerar kadib dhacay dagaal xoogan, ayna markii dame halkaas gaareen Ciidamo ka tirsan kuwa qeybta 21-aad oo Gurmad ahaa, xili Al-shabaabna ay qoreen inay halkaas la wareegeen.