Warar dheeraad ah ayaa kasoo baxaya qarax xoogan oo barqanimadii Maanta ka dhacay gudaha degmada Deyniile ee Gobolka Banaadir, kaasi oo jugtiisa laga maqlay xaafaddo ka badan Magaalada Muqdisho.
Qaraxaas oo ahaa miino nooca dhulka lagu aaso ah ayaa waxaa lala eegtay gaari uu watay Guddoomiye ku-xigeenka arrimaha siyaasadda Deyniile ee Gobolka, xili uu marayay laamiga gala Xaafada Daaru-salaam.
Dad goobjoogayaal ayaa waxaa ay ku warrameen in qaraxaas uu ka dhashay khasaaro isugu jira dhimasho iyo dhaawac, waxaana ku geeriyooday Guddoomiye ku-xigeenkii Siyaasada ee Deyniile Cabdi Maxamed Maxamuud (Fidacow).
Sidoo kale qaraxa ayaa waxaa ku dhaawacmay Askar la socotay Marxuum Cabdi Fidacow oo saarneyd gaariga uu qaraxu haleelay, kuwaasi oo la geeyay Xarun Caafimaad, isla markaana waxaa uu burbur soo gaaray gaariga oo ahaa nooca Soomaalida u taqaano Qooqan.
Ciidamo ka tirsan kuwa Booliska dowladda Federaalka ayaa tegay goobta, iyagoona soo qaaday Meydka Guddoomiye ku-xigeenkii Arrimaha siyaasadd Deyniile, waxaana welin ka hadlin qaraxaas Maamulka Gobolka Banaadir iyo kan degmada.
Dhawaan ayey aheyd markii qarax miino oo ka dhacay agagaarka xarunta degmada Deyniile uu ka bad baaday Xoghayaha degmada Deyniile, waxaana qarxaaasi ku dhintay dad badan oo shacab ahaa oo ku sugnaa goobta.
