Guddoomiyaha degmada Warta-nabada ee Gobolka Banaadir Seynab Maxamuud Warsame (Xaabsey) ayaa ka badbaaday qaraxii Is-miidaaminta ahaa ee ka dhacay barta Koontarool ee laga ilaaliyo wadada aada Garoonka diyaaradaha Aadan Cadde ee Magaalada Muqdisho.
Qof isku soo xiray jaakad waxyaabaha qarxa ayaa isku dhex qarxiyey gaadiid taagnaa Koontaroolka Ciidanka Nabadsugida dowladda ee lagu hubiyo gaadiidka aadaya dhanka Garoonka, waxaana qaraxaas uu ahaa mid xoogan oo jugtiisa laga maqlay Muqdisho.
Guddoomiye Seynab Xaabsey oo Qoraal kooban kusoo qortay barteeda Facebook ayaa sheegtay inay Nabad qabto, isla markaana waxaa ay tacsi u dirtay Askar la socotay oo ilaalo ahaa oo ku dhintay qaraxa, iyada oo Caafimaad u rajeeysay Askarta dhaawacantay.
“Alhamdulilah ilaahey ha unaxariisto askarteeni inta dhawacana allaha noo caafiyo waa nabad qabnaa Alhamdulilah” ayey tiri Guddoomiye Seynab Xaabsey oo ka badbaaday qaraxii Is-miidaaminta ahaa ee ka dhacay Magaalada Muqdisho.
Khasaaro isugu jira dhimasho iyo dhaawac ayaa ka dhashay qaraxa oo soo gaaray Askar ilaalo u aheyd Seynab Xaabsey iyo dad shacab ah oo goobta marayay, waxaana sidoo kalena dhaawacmay dad kale oo shacab ahaa, iyadoona ay gubatay kaalin shidaal oo ku taalla goobta.
Laamaha amniga dowladda Federaalka Soomaaliya ayaan weli ka hadlin qaraxaas khasaaraha dhaliyey ee ka dhacay Magaalada Muqdisho, qaraxa ayaa ku soo aaday, iyada oo Maanta ay bilaabaneyso hadal-jeedinta Musharaxiinta Madaxweynaha.
