Guddiga Maamulka Doorashooyinka Banaadiriga oo shaaciyay Jadawalka 5 kursi

Guddiga Maamulka doorashooyinka Xildhibaanada Banaadiriga ayaa xalay shaaciyay Jadwalka doorashada kuraas ka tirsan Golaha Shacabka Baarlamaanka 11-aad ee dowladda Federaalka Soomaaliya.

Qoraal ay soo saareen Guddiga doorashada Banaadiriga ayaa waxaa lagu sheegay in qabashada ergada iyo diiwaan-gelinta Musharaxiinta u tartamaya shanta kursi ee Xildhibaanada Banaadiriga ay bilaabaneyso 20-ka bishaan Febraayo 2022.

Guddiga ayaa shaaca ka qaaday in doorashada Golaha Shacabka ee shanta kursi ee Banaadiriga ay dhaceyso 21-ka Febraayo, isla markaana doorashada kuraastaas lagu qaban doono Magaalada Caasimadda ah ee Muqdisho oo loo qorsheeyay doorashada.

Maalmo kooban ayaa ka harsan waqtigii Madaxda Golaha Wadatashiga Qaran ku heshiiyeen in lagu soo gaba-gabeeyo doorashada Golaha Shacabka Baarlamaanka 11-aad ee dowladda Federaalka, waxaana waqtigaas uu ku egyahay 25-ka Febraayo.

About Dalsan Editor

View all posts by Dalsan Editor