Wasaaradda Arrimaha gudaha iyo dib u heshiisiinta dowlad Goboleedka Galmudug ayaa soo saartay Go’aan ay ku kala dirtay Guddigii farsamada ee dhismaha Golayaasha deegaanada Maamulkaas.
Wareegto kasoo baxday Xafiiska Wasiir ku-xigeenka Arrimaha Galmudug ahna sii-hayaha xilka Wasiirka Axmed Cismaan Aadan ayaa waxaa lagu sheegay in la kala diray Guddigii farsamada dhismaha Golayaasha deegaanada degmooyinka Galmudug.
Sababta loo kala diray Guddiga ayaa waxaa lagu sheegay in wadashaqeyn la’aan dhex jirto Guddoonka Guddiga iyo xubno kale oo isku khilaafay hab-raaca dhismaha Golaha deegaanka degmada Balanbale ee Galgaduud.
Arrintaan ayaa kusoo aaday, iyada oo maanta oo talaado filayo in degmada Balanbale ee Gobolka Galgaduud ay ka dhacdo doorashada Golaha deegaanka, kadib markii dhawaan lasoo xulay xubnaha Golaha oo uu ka jiro is qab-qabsi.
Madaxweyne ku-xigeenka Galmudug Cali Daahir Ciid ayaa maalmo kahor xilka qaadis ku sameeyay Wasiirkii Arrimaha gudaha Maamulkaas Cabdi Waayeel, isagoona ka hor yimid xilka qaadista lagu sameeyay, taas oo ka dhalatay xiisad la xiriirta dhismaha Golaha deegaanka Balanbale.
Hoos ka Akhriso Wareegtada kasoo baxday Wasiir Axmed Cismaan Aadan.
