Gaadiidleyda ku shaqeysata Mooto Bajaajta ka howlgasha Magaalada Garoowe ee Caasimadda Maamulka Puntland ayaa Maanta halkaas ka dhigay banaanbax cabasho ah oo ay uga soo horjeedan Go’aan kasoo baxay Guddiga amniga Gobolkaas.
Gaadiidleyda Mooto Bajaajta ayaa banaanbaxooda uga cabanayey Go’aankii looga mamnuucay Mooto Bajaajta isticmaalka wadada halbowlaha ah ee Magaalada Garoowe, isla markaana sheegay inay ka xun yihiin tallaabada la qaaday.
Qaar kamid ah Gaadiidleyda oo la hadlay warbaahinta ayaa u sheegay inay doonayaan inay maraan oo ay isticmaalan wadada halbowlaha ah ee Garoowe, balse Maamulka uu u diiday, ayna kasoo horjeedan Go’aanka, maadaama ay bixiyaan lacagta Canshuurta laga qaado gaadiidleyda.
Guddiga amniga Gobolka Nugaal ee Maamulka Puntland oo dhawaan shir yeeshay ayaa soo saaray Go’aan gaadiidka Mooto Bajaajta looga mamnuucay wadada halbowlaha ah ee Garoowe, iyagoona sababta ku sheegay inay bateen shilalka Mootada.
Guddiga amniga ayaa tilmaamay in tallaabo sharci ah laga qaadi doono cid kasta oo wadata Mooto Bajaaj oo isticmaasha wadada, isla markaana loo hoggaansamo Amarka kasoo baxay Guddiga amniga Gobolka Nugaal ee Maamulka Puntland.
