Faah faahino dheeraad ah ayaa kasoo baxaya Shil saacadihii lasoo dhaafay ka dhacay duleedka Degmada Guriceel ee Gobolka Galgaduud, kaasi oo geystay Khasaaro dhaawacyo ah .
Shilkaan ayaa waxaa uu yimid kadib markii ay isku dhaceen gaari nooca dagaalka ah oo ay la socdeen Askar ka tirsan Ciidanka dowladda iyo Mooto Bajaaj, waxaana la sheegay in gaariga uu ku socday xawaare sare uuna mar qura jiiray Mootada.
Ugu yaraan Saddex ruux oo laba kamid ah ay yihiin haween, halka kan kale uu yahay Darawalka waday Mooto Bajaajta ayaa ku dhaawacmay shirkaas, waxaana goobta tegay dadka deegaanka oo gurmad u sameeyay dadkii waxyeelada soo gaartay.
Dhaawacyada ayaa waxaa la geeyay Xarun Caafimaad oo ku taalla Degmada Guriceel ee Gobolka Galgaduud, waxaana lagu soo waramayaa in xaaladooda Caafimaad ay wanaagsan tahay.
Deegaano ka tirsan Gobolka Galgaduud ayaa waxaa mararka qaarkood ka dhaca shilal geysta Khasaarooyin isugu jira dhimasho iyo dhaawac, waxaana shilalka inta badan loo sababeeyaa Darawalada oo si xawaare sare ah u wada gaadiidka noocyadiisa kala duwan.