Dowladda Soomaaliya ayaa kulan looga hadlay joojinta dhuxusha sida sharci darrada ah looga dhoofiyo dalka iyo waxyeeleynta degaanka oo ay ka qeyb galeen dowlado iyo Qaramada Midoobay ku qabatay Magaalada Nairobi ee dalka Kenya.
Safaaradda Soomaaliya ee dalka Kenya ayaa marti galisay shirkaan oo ay ka qeyb galeen Dalalka Iskaashiga Gacanka Carabta, Bariga Afrika iyo Hay’adaha Qaramada Midoobay ee qaabilsan horumarinta iyo degaanka.
Mas’uuliyiin ka socday dowladda Federaalka Soomaaliya ayaa khudbado ka jeediyay madasha Shirkaan ka qabsoomay Magaalada Nairobi ee dalka Kenya, iyagoona sheegay inay sharci darro tahay jarista dhirta iyo dhoofinta dhuxusha dalka.
Safiirka Soomaaliya u fadhiya dalka Kenya Maxamuud Axmed Nuur Tarsan ayaa sheegay in dhammaan dalalkii kasoo qeyb galay shirkaan ay qaaxeen muhiimada ay leedahay in Soomaaliya laga caawiyo sidii loo joojin lahaa dhuxusha oo halis ku ah Soomaaliya.
Sidoo kale Madaxda ka qeyb galay Shirka ayaa tilmaamay in waxyaabaha keena Isbedelka cimilada ay qeyb tahay dhirta oo la jaro, isdoo kalena ay arrintaas waxyeelo u geystan garto deegaanka.
Si kastaba dalka Soomaaliya ayaa ka mid ah dalalka sida joogtada ah looga dhoofiyo dhuxusha, iyadoona horay dowladda iyo Qaramada Midoobey ay u mamnuuceen dhoofinta dhuxusha, kuna tilmaamay arrintaas mid sharci darro ah.
