Madaxweynaha Jamhuuriyadda Federaalka Soomaaliya Maxamed Cabdullaahi Farmaajo ayaa ka tacsiyeeyay geerida ku timid Madaxweyne Ku-xigeenkii Hore ee Puntland Janaraal Cabdisamad Cali Shire oo ku geeriyoodey magaalada Muqdisho.
Madaxweynaha ayaa tilmaamay in Marxuum Cabdisamed Cali Shire uu kaalin mug leh ka soo qaatay geeddi socodkii dowladnimada Soomaaliya iyo kan dhismaha Dowlad Goboleedka Puntland. Marxuumka ayaa ka mid ahaa Saraakiishii Ciidanka Xoogga Dalka Xilligii Dowladdii dhexe, isaga oo noqday Taliyaha Ciidanka Daraawiishta ee Puntland iyo Madaxweyne Ku-xigeenkii saddexaad ee soo mara Maamul Goboleedka Soomaaliyeed ee Puntland.
“Inaa lillaahi wa innaa ilahayhi raajicuun. Marxuum Cabdisamad Cali shire waxa uu ahaa odey Soomaaliyeed oo ay ku weyn tahay dowladnimada dalka iyo dib u soo celinteeda. Alle waxaan uga rajeynayaa in uu hoygiisa ka yeelo Janatul Firdowsa, samir iyo iimaanna ina ga siiyo.â€
Madaxweyne Maxamed Cabdullaahi Farmaajo ayaa si gaar ah ugu tacsiyeeyey Madaxweynaha Dowlad Goboleedka Puntland Mudane Siciid Cabdullaahi Dani, Madaxweyne Ku xigeenka Mudane Axmed Cilmi Cismaan, Bulshada Puntland, gaar ahaan qoyska iyo ehelada uu ka geeriyooday Alle ha u naxariistee Marxuumka.
Dhanka kale Ra’iisul Wasaaraha Dowladda Federaalka Soomaaliya Maxamed Xuseen Rooble ayaa dhankiisa tacsi tiiraanyo leh u diray umadda Soomaaliyeed gaar ahaan shacabka Puntland ee uu ka baxay Madaxweyne ku xigeenkii hore ee Maamulkaasi Gen.Cabdisamad Cali Shire.
“Waxaan Qoyskiisa, Asxaabtiisii iyo Guud ahaan Shacabka Soomaaliyeed uga tacsiyeynayaa geerida Allaha u naxariistee madaxweyne ku-xigeenkii hore ee Puntland Gen.Cabdisamad Cali Shire.
Marxuumka oo ahaa Jeneraal ka tirsanaan jiray Ciidanka Xoogga Dalka, waxa uu door wanaagsan ka soo qaatay difaaca Qaranka, isagoo sidoo kale ka mid ahaa aasaaseyaashii Puntland.Marxuumka Jannadii Firdows Allaha ka waraabiyo ehekiisana samir iyo iimaan Allaha ka siiyo” ayuu yiri RW Rooble.
