Kooxo ku hubeysnaa Bastoodo ayaa daqiiqado kahor xaafad ka tirsan degmada Kaaraan ee Gobolka Banaadir waxaa ay ku dileen Askari ka tirsanaa Ciidanka dowladda Federaalka gaar ahaan kuwa Canshuurta qaada ee loo yaqaano Minishiibiyada.
Dad la hadlay Idaacadda Dalsan ayaa u sheegay in Askariga ay toogasho ku dileen rag dhalinyaro oo watay Bastoolado, xili uu ku sugnaa agagaarka Kaawada Kawasiini ee xaafadda Jamhuuriyo ee degmada Kaaraan, isagoona Askariga ku dhintay goobta.
Dableydii falka geystay ayaa goobta si deg deg ah uga baxsatay, iyagoona la tilmaamay inay horey u sii qaateen qori Ak-47 oo uu watay Askariga ka tirsanaa Ciidanka Minishiibiyada ee dowladda Federaalka ee la khaarijyey.
Ciidamo ka tirsan kuwa Booliska dowladda Federaalka Soomaaliya ayaa sida caadada aheyd goobta uu falku ka dhacay gaaray, isla markaana halkaas ka qaaday Meydka Askariga la dilay, mana jirto cid loo soo qabtay dilkaas ka dhacay degmada Kaaraan.
Magaalada Caasimadda ah ee Muqdisho ayaa waxa maalmihii dambe kusoo batay dilalka qorsheysan oo ay geysanayaan rag ku hubeysan Bastoolado, waxaana inta badan dilalka iyo qaraxyada ka dhaca Magaalada mas’uuliyadooda sheegta Al-shabaab.