Magaalada Dhuusamareeb ee Caasimadda dowlad Goboleedka Galmudug ayaa waxaa lagu waday in 5-ta Bishan uu ka furmayo Shirweynaha Dib-u-heshiisiinta Galmudug oo ku dhawaaqay Ra’iisul Wasaaraha Xukuumadda Federaalka Soomaaliya Xasan Cali Kheyre,hayeeshee dib u dhac ayaa ku yimid.
Guddiga qaban-qaabada shirka dib-u-heshiisiinta Galmudug ayaa sheegay in isbedel lagu sameeyay jadwalkii furitaanka Shirweynaha,iyagoona sababta ku sheegay inay tahay maalmaha baroordiiqda loo asteeyey iyo munaasabadda maamlmaha Ciidul Adhxaa ee foodda nagu soo haysa.
Sidoo kale Guddiga ayaa dhawaaqay in Shirweynaha Dib-u-heshiisiinta Galmudug Magaalada Dhuusamareeb uu ka furmi doono 17-da Bishan August ee 2019.
Guddiga oo ka kooban 12 xubnood ayaa dhawaan ku dhawaaqay in shir-weynaha dib-u-heshiisiinta Galmudug la qaban doono 5-Bisha August oo maalinta Berri ku beegan,hayeshee dib u dhac ayaa ku yimid.
Magaalada Dhuusamareeb ayaa waxaa taallo Gogosha Dib-u-heshiisiinta Galmudug,waxaana shirkaas dowladda Federaalka ay doneysnaa in lagu dhameeyo waxkasto oo cabasho ah oo ka dhex jira beelaha wada dega halkaas,isla markaana la dhiso Galmudug mideysan oo loo dhan yahay.
