Xabsiga dhexe ee Xamar ayaa waxaa si kedis ah ugu geeriyooday mid ka mid ah Maxaabiista ku xirneyd xabsigaas kaas oo ku eedeysnaa fal la xiriira in uu ka tirsanaa Al-Shabaab isla markaana horay loo xukumay.
Taliska Ciidanka Asluubta Soomaaliyeed ayaa xaqiijiyay geerida Wiilkaas Dhalinyarada ah horana loo xukumay balse shalay Gelinkii dambe lagu dhex dilay Xabsiga dhexe ee Xamar.
Taliye ku xigeenka Ciidanka Asluubta Soomaaliyeed Cabdi Kariin Cali Afrax oo sigaar ah ula hadlay Dalsan ayaa sheegay in arrintaan ay ku timid xili Maxaabiista ay ciyaarayeen Ciyaar Kubada Cagta ah ay wada murmeen laba Maxbuus oo mid ka mid ah lasiiyay Calaamada Roosaha sidaasna Garoonka looga saaray.
Waxa uu sheegay in intaasi kadib Maxbuuskii Roosaha lasiiyay uu feer la dhacay midkii kale ay horay u wada murmeen sidaasna uu ku suuxay mudo kadibna markii la geeyay Qolkii uu ka deganaa Xabsiga uu ku dhex geeriyooday.
Waxa uu hadalkiisa intaas raaciyay in aysan jirin warar uu sheegay in Idaacadaha qaar ay baahiyeen oo ahaa in Askari ka tirsan ciidamada ay wada dagaalameen kadibna lagu xiray Kuntineer balse warka xaqiiqadiisa uu yahay in Wiilka Dhalinyarda ah uu dilay Ninka kale ee Maxbuuska ah.
Waxa uu sheegay in labada Maxbuus ee ku eedeysnaa Shabaabnimo horay loogu xukumay Sideed Sano oo Xabsi ah 7 Sano ay dhameysteen hal Sano kaliya uu u dhinaa musiibadaana ay dhacday.
Ma ahan Markii ugu horeysay ee Ruux loo heysto in uu ka tirsanaa Al-Shabaab uu ku dhex geeriyoodo Xabsiga dhexe ee Xamar 21 Bishii May ee Sanadkii tegay ee 2017 ayaa waxaa Xabsiga dhexe ku dhex geeriyootay Deeqo Diraac Geeddi oo loo heystay in ay ka tirsaneyd Al-Shabaab taas oo ku xukuneyd 15 Sano oo Xabsi ah.
Hoos Ka Dhageyso Wareysiga Taliye ku xigeenka Ciidanka Asluubta Soomaaliyeed.
