Weli waxaa sii xoogeysanaya khilaafka u dhaxeeya gudoonka Golaha Shacabka Soomaaliya,iyada oo khilaafka ugu weyn ee haatan uu yahay cida shir gudoomineyso kulanka Baarlamaanka Soomaaliya oo loo balan sayahay maalinta Sabtida ah ee Beri oo ay horay kulankaas u iclaamiyeen gudoomiye Jawaari iyo ku xigeenkiisa 1aad.
Gudoomiye Jawaari ayaa shir gudoomiyey kualnkii shalay ee Gudiga joogtada Golaha Shacabka,waxana laga soo saaray in kulanka Sabtida Ajendaha kulanka uu noqdo xiisada ka taagan Balad Xaawo,halka habeen ka hor Xildhibaano taagersan Jawaari ay sheegeen in mooshinkii laga gudbiyey uu bur buray.
Gudoomiye ku xigeenka 1aad ee Golaha Shacabka Cabduweli Sheekh Ibarahim Muudeey ayaa xalay Saqdii dhexe waxa uu soo saaray War-Saxaafadeed uu ku sheegay in mooshinkii laga gudbiyey Gudoomiyaha Baarlamaanka Soomaaliya uusan waxba iska beeline.
Warsaxaafadeedka ayaa waxaa Warbaahinta u Akhriyey Xildhibaan Maxamed Xasan Idiris,waxana lagu sheegay in uusan waxba iska bedelin habraacii mooshinka laga gudbiyey Jawaari,isla markaana mooshinkaas la horgeyn doono Baarlamaanka Maalinta Sabtida ah.
Waxaa lagu sheegay in mooshinka laga kenay Jawaari laga doodayo loona codeynayo mudo 10 Maalmood oo Shaqo gudahaood laga bilaabo Maalintii mooshinka la gudbiyey.
Sidoo kale waxaa lagu sheegay in Guddiga joogtada Golaha Shacabka uusan ka hadli Karin howlaha Baarlamaanka inta uu furan yahay kalfdhiyada Baarlamaanka laakin uu Shaqooyin qaban karo hadii uu Baarlamaanka fasax ku jiro.
Ugu dambeyn waxaa lagu soo gaba gabeeyay Warsaxaafadeedka in gudoomiyaha Baarlamaanka Soomaaliya Maxamed Sheekh Cusmaan Jawaari uusan sharciyan ku hadli Karin inta Go’aan laga gaarayo mooshinka laga gudbiyey.
Hoos Ka Dhageyso Warsaxaafadeedka ka soo baxay Gudoomiye kuxigeenka 1aad ee Golaaha Shacabka Cabduweli Ibraahim Muudey.
