Ciidamadii Mareykanka ee Syria ee u tallaabay Ciraq iyo sababta keentay

Ciidamada Mareykanka ayaa maanta u tallaabay dalka Ciraq, taasi oo qeyb ka ah ka bixitaankooda waqooyiga Syria ee uu amray madaxweyne Donald Trump ee dhabbaha u xaaray weerarkii ciidamada Turkiga ay ku qaadeen.

Sawir qaade ka tirsan wakaaladda wararka Reuters ayaa arkay in ka badan 100 gaari oo ka gudbaya waqooyiga bari ee dalka Syria, halkaas oo Turkiga ay ogolaadeen inay joojiyaan howl-galkii ay ka wadeen kadib heshiis xabad-joojin ah oo dhex maray Washington iyo Ankara.

Xoghayaha gaashaandhigga, Mark Esper ayaa sabtidii sheegay in dhammaan 1,000 askari ee Mareykanka ah ee ka baxaya waqooyiga Syria ay u gudbi doonaan galbeedka Ciraq, halkaasi oo ay kasii wadi doonaan dagaalka ka dhanka ah mintidiinta Daacish, “si ay gacan uga gaystaan difaaca Ciraq”.

Madaxweynaha Turkiga Reccep Tayyip Erdogan ayaa ka digay in Ankara ay dib u billaabi doonto howlgalkeeda militari ee Syria marka xabad joojinta ay dhamaato talaadada, haddii ciidamada Kurdiyiinta ay hoggaamiyaan ee SDF aysan ka wad bixin “aagga amni” ee xuduudda ku teedsan.

Axaddii, ciidamada SDF ayaa sheegay inay ka baxeen magaalada xuduudda ku taalla ee Ras al-Ain, taasi oo qeyb ka ahayd heshiiska xabad joojinta Mareykanka uu ka shaqeeyey, hase yeeshee ciidamada mucaaradka Syria ee uu taageero Turkiga, ayaa sheegay in weli aysan si buuxda uga wada bixin.

About Bilan Media

Bilan is Somalia’s first ever all-women media team. Staffed and run entirely by women with full editorial independence, the unit covers hard news and in-depth features, holding leaders to account and making sure the media represents all citizens, men and women, weak and powerful, rich and poor.

View all posts by Bilan Media